सरकारं भारत, अमेरिका व बेलायतया नितिं खाली पदय् राजदुत नियुक्तिया सिफारिस याःगु दु ।

मन्त्रिपरिषदया बुधबाः च्वंगु मुँज्यां भारतया नितिं डा.शंकर शर्मा, अमेरिकाया नितिं श्रीधर खत्री व बेलायतया नितिं ज्ञानचन्द्र आचार्ययात राजदुत सिफारिस याःगु खः । भारतया नितिं राजदुतय् सिफारिस डा.शर्मा थ्वयान्ह्यः अमेरिकाया नितिं राजदुत जुयादीगु खः ।

अमेरिकाया नितिं राजदुतय् सिफारिस खत्री परराष्ट्र मामिलाया विज्ञ लिसें राजनीतिक शास्त्रया प्राध्यापक जुयादी । अथेहे , बेलायतया राजदुतय् सिफारिस आचार्य थ्वयान्ह्यः संयुक्त राष्ट्रसंघया स्थायी प्रतिनिधि लिसें उपमहासचिव पदय् च्वना ज्या यायेधुंकुम्ह जुयादी । थ्वयान्ह्यःया सरकारं नियुक्त याःम्ह राजदुतयात वंगु असोजय् सरकारं लितसतेगु निर्णय याःगुलिसें थी थी देशय् राजदूत पद खाली जूगु खः ।

अथेहे , सरकारं बेमौसमी वाःया हुनिं वाःबालीइ जूगु क्षतिया विषयलय् जग्गाया क्षेत्रफलयात लिधंसा दयेका अधिकतम् ६२गु प्रतिशत राहत बिइगु निर्णय याःगु दु । सरकारया प्रवक्ता ज्ञानेन्द्रवहादुर कार्कीया कथं चिधंपिं किसान अर्थात अप्वःलय् १०गु कठ्ठा जग्गाय् वाः बाली दूपिन्त क्षतिया अधिकतम् ६२ गू प्रतिशत राहत बिइगु जूगु दु ।

१० गू निसें ३गू बिगाहा तक्कया वाः बाली क्षति जूपिं क्षतिया ३०गू प्रतिशत व तःधंपिं किसानयात क्षतिया अधिकतम् २०गू प्रतिशत तक्क राहत चूलाकेगु सरकारं निर्णय याःगु दु ।

राहत वितरणया कार्यविधि दयेकेत प्रधानमन्त्री लिसें मन्त्रिपरिषद् ज्याकु सचिवया कजिसुइ कार्यदल दयेकुगु व कार्यदलं ५न्हू दुने कार्यविधि दयेका मन्त्रिपरिषद्य् पेश जुइगु प्रवक्ता कार्कीं जानकारी बियादील ।

सरकारं थ्वयान्ह्यः वाः बालीइ जूगु क्षतिया धलः यकिन यायेत गृहसचिवया कजिसुइ कार्यदल गठन याःगु खः । अथेहे मुँज्यां खुसिबाः चलःखय् लाना बेपत्ता जूम्ह मनूया छेँजःयात छेँजः पतिकं २गू लख तका राहत बिइगु निर्णय याःगु दु ।

Categorized in राष्ट्रिय