सरकारं थीथी पदय् नियुक्ति यात
लहनान्यूज | दिल्लागा चतुर्थी ११४१,साउन १२ मंगलवाः
सरकारं राष्ट्रिय योजना आयोगया उपाध्यक्षय् डा. विश्व पौडेलयात नियुक्त याःगु दु ।
थौं च्वंगु मन्त्रिपरिषद वैठकं डा पौडेलयात योजना आयोगया नायःलय् नियुक्त यायेगु क्वजिउगु खः । अथेहे डा. रामकुमार फुयाल व डा. दिलबहादुर गुरुङयात आयोगया दुजःलय् नियुक्त याःगु दु । गुरुङ थ्वयान्ह्यः नं आयोगया है दुजः जुयादिगु खः ।
अथेहे सरकारं गण्डकी प्रदेश प्रमुखय् पृथ्वीमान गुरुङ व लुम्बिनी प्रदेश प्रमुखय् अमिक शेरचनयात नियुक्तिया नितिं सिफारिस यायेगु निर्णय याःगु दु । ओली सरकारं गण्डकी प्रदेश प्रमुखपाखें लिछ्याम्ह शेरचनयात लुम्बिनी प्रदेशया प्रमुख याःगु खः ।
संविधानया धारा १६३ या उपधारा ४ कथं प्रदेश प्रमुखय् छम्ह हे मनु जुइ मदइगु जुसेंलि शेरचनयात लुम्बिनी प्रदेशया प्रमुखय् यंकूगु खः । गण्डकी प्रदेश प्रमुखय् सिफारिस याम्ह गुरुङ चितवन कांग्रेसया पूर्व सभापति जुयादि । मन्त्रिपरिषद वैठकं ओली सरकारं नियुक्त याम्ह गण्डकी प्रदेश प्रमुख सीता पौडेल व लुम्बिनी प्रदेश प्रमुख धर्मनाथ यादवयात लिछ्यायेगु निर्णय याःगु खः ।
अथेहे सरकारं नेपाली सेनाया बलाध्यक्ष रथी प्रभुराम शर्मायात साउन २४ निसें लागू जुइकथं नेपाली सेनाया कामु प्रधानसेनापतिया जिम्मेवारी बिइगु निर्णय नं याःगु दु । भदौ २५ गते कार्यकाल पूवंनिम्ह प्रधानसेनापति पूर्णचन्द्र थापा लच्छि न्ह्यः हे विदाय् च्वनिगु जूगुलिं शर्मायात कामु प्रधानसेनापतिया जिम्मेवारी बिइगु निर्णय याःगु खः । नेपाली सेनाया ४४म्ह प्रधानसेनापति जुइम्ह शर्मा आः बलाध्यक्ष व बलाधिकृत निगूलिं भाला कुबिनावयाच्वंगु दु ।
Categorized in राष्ट्रिय
