सरकारं बालुवाटारस्थित ललिता निवास परिसरया सरकारी जग्गा त्यगु व त्यलेगु प्रक्रियाय् दुथ्यापिं विरुद्ध मुद्धा दर्ता यायेत पंगु दु ।

नेपाल प्रहरीया केन्द्रीय अनुसन्धान ब्युरो (सीआईबीं) ३दँया अनुसन्धानलिपा तयार याःगु प्रतिवेदनयात सरकारी वकिलया ज्याकुथिं हाकनं सीआइबीइ हे लितछ्वके बिया सरकारं मुद्धा न्ह्याकेत पंगु खः ।

महान्यायाधीवक्ता खम्बहादुर खातीया  निर्देशनय् सरकारी वकिलया ज्याकुथिं सीआइबीया प्रतिवेदन लितछ्वगु सीदूगु दु । मुद्दा दायर यायेधुंकेमाःगु हदम्यादया छन्हू न्ह्यः म्हिगः सरकारी वकिलया ज्याकु येँ नं प्रतिवेदन सीआईबीयात लितछ्वगुलिं आः मुद्दा प्रक्रिया न्ह्याकेत असहज जूगु दु ।

राजनीतिक लिसें आर्थिक स्वार्थया हुनिं सीआइबीया प्रतिवेदन दिकुगु धका सरकोरवाला व कानुनविद्तयेसं सरकारया कुँख्यंगु दु । सीआइबीलं ३दँया अनुसन्धानलिपा ३सःम्ह विरुद्ध मुद्धा न्ह्याकेमाःगु लिच्वः लिसें मुद्धा प्रक्रिया न्ह्याकेत स्वःगु खः । सीआइबीया प्रतिवेदनय् पूर्व प्रधानमन्त्री लिसें मन्त्रीतये नाँ तकं दूगु सीदूगु दु ।

ललिता निवास जग्गा हिनामिनाय् दुथ्यापिं राजनीतिक मनूत, सरकारी कर्मचारी, ब्यापारी व विचौलियात विरुद्ध अख्तियार दुरुपयोग अनुसन्धान आयोगं दायर याःगु मुद्दा विशेष अदालतय् विचाराधीन दु ।

जग्गा त्यलेत सरकार भ्वँ गायब यायेगु, भ्वँ केरमेट यायेगु व थी थी इलय् जूगु नीतिगत निर्णयया अपब्याख्या यायेगु ज्या जूगु नं सीआइबीया प्रतिवेदनय् उल्लेख यानातःगु दु ।

प्रधानमन्त्री, प्रधानन्यायाधीश व सभामुखया निवास दूगु परिसरया त्यःगु जग्गाया आःया न्यूनतम बजाः मू थ्यंमथ्यं १४ गू अर्ब ध्यबा कामय याना सीआइबीं उगु ध्यबायात विगोया रुपये तःगु दु ।

३दँ दुने ५०म्ह सिवें अप्वः अधिकृत व विशेषज्ञ खटे जुया तयार जूगु प्रतिवेदनय् ९१ दँ पुलांगु तथ्ययात दसिया रुपय् प्रस्तुत याःगु दु ।

सीआईबीं उगु प्रकरणया मू अभियुक्त मध्येया छम्ह रामकुमार सुवेदी व वयेकया तिरि माधवीयात थगुनेया पुस ७ गते ज्वंगु खः  ।

देय्या अपराध संहिता २०७४ कथं कीर्ते मुद्दाय् सीदूगु २ दँ दुने मुद्दा न्ह्याकेमाःगु व्यवस्था दु ।

Categorized in राष्ट्रिय