सरकारया ज्याखं देय् मछिंगु अवस्थाय् थ्यन : सभापति देउवा
नेपाली काँग्रेसया सभापति शेरबहादुर देउवां कम्युनिष्टया शासनं देय् मछिंगु अवस्थाय् लाःगु धयादीगु दु ।
 
महाधिवेशन प्रतिनिधिपिनिगु नितिं सुर्खेतय् जूगु प्रशिक्षण ज्याझ्वःयात सम्बोधन यानादिसें प्रधानमन्त्रीतकं जुयादीधुंकूम्ह नेता देउवां उगु खँ धयादीगु खः । वय्लं सरकारं याःगु ज्याखँया हुनिं हे देस मछिंगु अवस्थाय् थ्यंगु दावी यानादिल ।
 
स्थायी प्रजातन्त्र कांग्रेसया म्हगस जूसा नं थुकियात कम्यूनिष्टया नेतृत्वय् दुगु सरकारं क्वत्यःगु देउवां द्वपं बियादिल ।
 
सरकारं हःगु प्रेस काउन्सिल विधेयकं जनताय म्हुतुप्वाः प्वाःतीगु कुतः याःगु टिप्पणी यानादिसें सभापति देउवां प्रेस स्वतन्त्रताया विश्वव्यापी मान्यतायात वर्तमान सरकारं विधेयकपाखें क्वत्यलेत स्वःगु धयादिल । देसय् निर्वाद स्वतन्त्रताया नितिं वर्तमान सरकार लिचिलेमाःगु देउवाया धापू खः ।
 
पार्टीया आन्तरिक विभाजनया विषयस देउवां थःम्हेस्यां ययेक ययेकं नं पार्टी छधी छप्पँ जुइमफूगु धयादिल । पार्टीदुने एकता असम्भव मजूगु धयादिसें देउवां धयादिल, ‘माओवादी व एमाले मिले जुयाः थौंकन्हय् नेपाल कम्यूनिष्ट पार्टी (नेकपा) जुइत सम्भव दुसा झीगु आन्तरिक एकता नं सम्भव दु ।’
 
देउवां पार्टीदुने अन्तर्घात याइपिन्त् अनिवार्य कारवाही यायेमाःगु खँ धयादिसें कारवाही मयाःसा वइगु चुनावय् नं अन्तर्घात हावी जुइगु धयादिल ।
Categorized in राजनीति