२०८१ आषाढ १२, बुधबार

सरकारया पालंपाः नेतृत्वया सहमति कार्यान्वयन जुइमाःगु : नेता पौडेल

लहना न्यूज | ने.सं. ११३९ दिल्लागा तृतिया (२० जुलाइ, २०१९), सञ्चरवाः

नेपाल कम्युनिष्ट पार्टी (नेकपा)या स्थायी समिति दुजः देवेन्द्र पौडेलं तत्कालीन एमाले व माओवादी केन्द्र दथुइ जूगु पालंपाः सरकारया नेतृत्वलिसें ५गू बुँदाया सहमति छुं नं हालतय् कार्यान्वयन जुइमाःगु धयादीगु दु ।
 
प्रदेश ५या बुटवलय् ग्वसाः ग्वःगु साक्षात्कार ज्याझ्वलय् न्ववानादिसें नेता पौडेलं उगु खँ धयादीगु खः । वय्कलं सरकारया ज्याखँ प्रभावकारी मजूगु धयादिसें सरकारया नेतृत्व हिलेत तकं माग यानादिल ।
 
ज्याझ्वलय् नेता पौडेलं सार्वजनिक हे जुइधुंकूगु विषय सुचुकेमाःगु छुं नं कारण मदुगु व न्हापा जूगु थुगु सहमतियात आधार दयेकाः इमान्दारितालिसें न्ह्याः वनेमाःगु खँय् बः बियादिल ।
 
नेपाल कम्युनिष्ट पार्टी (नेकपा)या नेतात दथुइ न्हापा पालंपाः सरकारया नेतृत्व यायेगु सहमति जूसां नं थुकियात कयाः नेतात हे विभाजित जूगु खनेदु ।
 
प्रधानमन्त्रीलिसें नेकपाया नायः केपी शर्मा ओली लिक्क लाःपिं नेतात थ्व हे सरकारं ५दँ तक हे नेतृत्व यायेमाःगु पक्षय् दुसा तत्कालीन माओवादी दुने व पिनेया नेतात धाःसा न्हापा जूगु भद्र सहमति पालना यानाः न्ह्याःवनेमाःगु पक्षय् दु ।
 
पुष्पकमल दाहाल प्रचण्ड लिक्क लाःम्ह नेता पौडृलं सरकारय् ओलीया नेतृत्व हिलीगु व उगु भूमिका पाटीया मेम्ह नायः प्रचण्ड याइगु दावीय यानादिल । तर सरकारया नेतृत्व हिलेगु ई धाःसा मवःनीगु पौडेलया धापू दु ।
 
नेता पौडेलं सरकार सुशासनया दिशाय् कमजोर खनेदुगु नं उगु इलय् धयादिल । निर्मला काण्ड, संसदय् दर्ता जूगु थीथी विधेयक, विषादी परीक्षणलिसेंया विषयस सरकार बुद्धिमत्तापूर्वक न्ह्यःने मवंगु पौडेलया दावी दु । थ्व हे झ्वलय् गुथि विधेयक तत्कालया नितिं स्थगन जक जूगु धयादिसें लित मकाःगु नं पौडेलं स्पष्ट यानादिल ।
 
नेता पौडेलं पार्टीपाखें सरकारय् वंपिं मन्त्रीतय्गु कार्यशैलीयात कयाः नं असन्तुष्टि प्वंकादिल । खनेदइकथं सरकारं परिवर्तन हयेमफूगुली मन्त्रीपिनिगु भूमिका दुगु धयादिसें पौडेलं सरकार गतिशील दयेकेत मन्त्री हिलेमाःगु नं धयादिल ।
Categorized in राजनीति