सरकारया ‘नालायकीपन’
जुजुमान महर्जन
 
भारतपाखें आयात जुइगु तरकारी व फलफूलया विषादी परीक्षण कडाई याय्गु नीतिपाखें सरकार लिचिलेवं सरकारया ज्याखँयात कयाः छचाखेरं आलोचनाया शिकार जूगु दु ।
सरकारं विषादी परीक्षणया नितिं माःकथंया तयारी मजूगुलिं खुलाया नितिं थुगु नीति स्थगित याःगु वंगु विहीवाः मन्त्रीपरिषदया मुँज्यापाखें निर्णय जूगु सार्वजनिक याःगु खः ।
 
सरकारं वंगु असार २ गते राजपत्रय् हे सूचं पिथनाः भन्सार विन्दुइ क्वारेन्टाइन व जीवनाशक विषादीया अवशेष अनिवार्यकथं परीक्षण याय्गु नीति हःगु खःसा थ्व हे नीतिकथं भारतपाखें दुहांवइगु तरकारी व सिसाबुसा परीक्षण यानाः जक नेपाः दुकाय्गु धकाः नाकाय् पनातःगु खः । थ्व तसकं हे बांलाःगु ज्या खः धकाः च्वछाय््गु ज्या हे क्वमलानि, सरकारं थःम्हेस्यां याःगु निर्णय हाकनं लितकाय्गु ज्या यात । थ्व तसकं हे क्वह्यंगु ज्याकथं आलोचना याःगु दु ।
 
 
परराष्ट्र मन्त्री प्रदीप ज्ञवालीं बुटवलय् जूगु छगू ज्याझ्वःयात सम्बोधन यानादिसें नेपाः समृद्धिपाखें न्ह्याःवनेगु नितिं छगू चरण पार जुल धयादीगु खः । तर समृद्ध नेपाःया नितिं थनया जनतापिनिगु स्वास्थ्य नं उलि हे बांलाय्माः धकाः सायद वय्कलं मस्यूगु जुइमाः । मखुसा, नेपाःमिपिनिगु स्वास्थ्ययात कयाः सरकार गुलि सम्बेदनशील जू, अले नेपाःमित स्वस्थ जीवन हनेगु मौलिक हकयात तकं बेवास्ता यासें थुकथं विदेशपाखें वःगु नसाज्वलंया परीक्षण हे मयासे थुकथं विषादीयुक्त नसाज्वलं अर्थात तरकारी व सिसाबुसा दुकाय्गु गुलितक पाय्छि जुइ ?
 
 
 
मन्त्रीपरिषदय्या निर्णययात कयाः सम्बन्धित मन्त्रालयया मन्त्रीपाखें हे परीक्षण याय्गु ज्या न्ह्यानाच्वंगु खँ न्ह्यथसें थुगु ज्याया नितिं पूर्वाधार मगाःसां स्थगित हे याय्माःगु अवस्था मदुगु धयादिल । तर ‘सुखी नेपाःमि, समृद्ध नेपाः’या नारा बियाः न्ह्यज्यानाच्वंगु सरकारं थःगु नीतियात तकं हाचां गाय्माःगु गजाःगु अवस्था वल ? थजाःगु निर्णयपाखें पक्का नं नेपाःमि सुखी जुइमखु धकाः सरकारं स्यूसां नं छाय् बांलाःगु पलाःपाखें सरकार लिचिलेमाल धकाः सकस्यां कुंखिनाहःगु दु । खय्त ला सरकारं असार २ गते विषादी परीक्षणया नीति हय्वं भारतं गम्भीर च्यूताः प्वंकूसें नेपाल सरकारयात निर्णय लित काय्त दबाब ब्यूगु खः ।
 
 
नेपाःया थुगु नीतिपाखें भारतया किसान व व्यवसायी मारय् लाःगु धासें भारतीय दूतावासं पौतकं च्वःगु खःसा उद्योग, वाणिज्य तथा आपूर्ति मन्त्रालययात पौ च्वयाः नेपाःया सीमा नाकाय् शुरु याःगु तरकारी व सिसाबुसायात विषादी परीक्षण मयाय्त सरकारयात इनाप तकं याःगु खः । नापं नेपाःया सीमा नाकाय् थ्यनेधुंकूगु थःगु देशया कृषिजन्य उत्पादन ज्वनावःगु सवारी साधन मपनेत तकं इनाप याःगु खः ।
 
 
थ्व लिपा सरकारं थःगु विषादी परीक्षण याय्गु नितिं पूर्वाधार हे तयार मजूनि धकाः थःगु निर्णय स्थगित याःगु सार्वजनिक याय्वं सरकार धात्थें सुनां न्ह्याकाच्वंगु दु ? धइगु खँ स्पष्ट जूगु दु । नेपाःमितसें विषादी दुगु नसाज्वलं उपभोग मयाकेगु नितिं सरकारं भारतं वइगु तरकारी व सिसाबुसा जक मखु, नेपालय् हे उत्पादन जुइगु तरकारी व सिसाबुसाया विषादी परीक्षण यानाः नय्बहःजू धकाः ‘ट्याग’ तिकेमाःगु अवस्थाय् भारतपाखें वइगु नसाज्वलं हे परीक्षण मयासें दुकाय्गु ज्या गुलितक पाय्छि जू ।
 
 
अलय् जनस्वास्थ्ययात कयाः सरकार गुलि सम्वेदनशील दु धइगु खँ थुकिं स्पष्ट याःगु दु । यदि पूर्वाधार तयार मजूनिगु खःसा सरकारं तुरुन्त हे पलाः न्ह्याकाः जनस्वास्थ्ययात कयाः सरकार न्ह्यचिलेमाल । दुई तिहाईया सरकार ‘नालायक’ सरकार मजुइकेगु नितिं पिने देशया दबाबपाखें न्ह्याःवनेगु मखु, नेपाः व नेपाःमिपिनिगु हीतय् पलाः न्ह्याकेमाःगु थौंया माग खः ।