२०८० चैत्र १६, शुक्रबार

सरकार खुसिवालं पीडितयात कयाः सम्बेदनशील मजू : सभापति देउवा

लहना न्यूज | ने.सं. ११३९ दिल्लागा पारु (१७ जुलाइ, २०१९), बुधवाः

खुसिवालं पीडितपिनिगु अवस्था थुइकेत रौतहट थ्यंकादीम्ह नेपाली कांग्रेसया सभापति शेरबहादुर देउवां सरकारयात तं प्वंकादीगु दु ।
 
उपसभापति विमलेन्द्र निधि व रौतहटया सांसद मोहम्मद अफ्ताब आलमयातनापं रौतहट थ्यंकादीम्ह देउवां खुसिवालं प्रभावित गढीमाई नगरपालिकाया लक्ष्मीपुर, धनारी, दुर्गा भगवती गाउँपालिकाया वडा ल्याः १, २ व ५लिसें सदरमुका गौरया स्थलगत निरीक्षण यानादीगु खः ।
 
थ्व हे झ्वलय् पीडित छेँजःपिन्त नापलानादीम्ह देउवां प्राकृतिक प्रकोपया इलय् नं सरकार जनतायात कयाः सम्वेदनशील मजूगु धयादिल । भारतीय बाँधया हुनिं नेपाःया भूभाग डुबानय् लाःगु इलय् नं सरकारं कुटनीतिक पहल मयाःगु देउवां द्वपं बियादीगु दु । भारतीय बाँधया हुनिं रौतहटय् जूगु डुबानयात कयाः सरकारं लिसः बीमाःगु देउवाया धापू खः ।
 
सरकारय् हे दुगु मधेस केन्द्रित दलं नं मधेसया जनताया भावनाया दुरुपयोग याःगु नं सभापति देउवां द्वपं बियादिल । चुनावया इलय् मधेसी धकाः मत फ्वंपिं नेतातसें जनता न्यान्हु न्ह्यःनिसें नये मखंगु व देने मखंगु इलय् नं सरकारं बेवास्ता याःगु धकाः कुंखिनादिल । 
 
थ्व हे झ्वलय् सभापति देउवां खुसिवालं पीडितपिनिगु नितिं कांग्रेसया सांसदतसें न्यान्हुया बराबरया तलब बीगु क्वःछ्यूगु व पुनःस्थापना नापं दिगो समस्या ज्यंकेगु नितिं संसदय् सः ल्ह्वनेगु नं धयादिल ।
 
रौतहटय् खुसिवाःया हुनिं गुम्ह सीगु खःसा ७०द्वः स्वयां अप्वः मनूत प्रभावित जूगु खः ।
Categorized in राजनीति