सरकार व माओवादी दथुइ विस्तृत शान्ति सम्झौता जूगु १५दँ पूवन
लहनान्यूज | कछलागा द्वितिया, मंसीर ५ आइतबाः
नेपालय् १५दँ न्ह्यः थौंया हे दिं तत्कालीन सरकार व माओवादीं विस्तृत शान्ति सम्झौता मार्फत छगू दशक ताहाकःगु माओवादी युद्ध अन्त्यया घोषणा याःगु खः ।
विसं २०६३ मंसिर ५ गते तत्कालीन प्रधानमन्त्री गिरिजाप्रसाद कोइराला व माओवादी नायः पुष्पकमल दाहाल (प्रचण्डं) ल्हाचिं तःगु शान्ति सम्झौताया मू कार्यभार खः– संविधान सभापाखें न्हूगु संविधान निर्माण, माओवादी लडाकुया व्यवस्थापन, संक्रमणकालीन न्याय व आर्थिक–सामाजिक रुपान्तरण ।
शान्ति सम्झौतां निर्धारणा याःगु आज्जु मध्ये ६ दँ न्ह्यः संविधान सभामार्फत संविधान निर्माण जुइधुंकुगु दु । अथेहे ९ दँ न्ह्यः हे माओवादी लडाकुया समायोजन व व्यवस्थापनया ज्या नं क्वचायेधुंकुगु दु । तर संक्रमणकालिन न्याय संपादनया ज्या धाःसा अझं लिच्वःस थ्यने फूगु मदुनि ।
१० दँया ल्वापुया झ्वलय् तत्कालीन राज्य पक्ष व माओवादीपाखें जूगु मानव अधिकार उल्लंघनया छानविन याना सत्य तथ्य लुइकेगु व दोषीयात कार्वाही यायेगु ज्याय् छुं नं प्रगति जुइ फूगु मदुनि । आः नं द्वलंद्वःम्ह द्वन्द्व पीडित सत्य व न्याययात पियाच्वंगु दु ।
Categorized in राष्ट्रिय
