सरकार संक्रमण नियन्त्रण याय्गुपाखे कि फैले याय्गुपाखे
कोभिड १९ संक्रमणं ला नेपाः जक मखु, मुक्कं हलिं हे आक्रान्त जुयाच्वंगु स्थिती दु । मेमेथाय् स्वयां नेपाः देय्या स्थिती धाःसा गम्भीर ताय्कामाःगु स्थिती दु ।
मेमेगु विकशित देशय् ला अर्थतन्त्र नं बल्लाः, जनशक्ति, आवश्यक भौतिक पुर्वाधार, स्वास्थ्य उपकरण सकतां दु । तर थन नेपालय् न त अर्थतन्त्र बल्लाः, न त चिकित्सक, नर्स लगायतया दक्ष जनशक्ति गाक्क ल्याखय् दु, न त अस्पताल हे गाक्क दु, न स्वास्थ्य उपकरण हे । स्वास्थ्य उपकरण वा आवश्यक स्वास्थ्य सामग्री दक्व हे धइथें पिने देशं हय्माः । थज्याःगु अवस्थाय् संक्रमण नियन्त्रणपाखे नेपाल सरकार अतिकं गम्भीर जुइमाःगु खः ।
थन संक्रमण फैले जुइकाः वासः याय्त गुलित समस्या दु धइगु आः कनाच्वनेमाःगु स्थिती मदय्धुंकल । सक्रिय संक्रमित च्याद्वः झिद्वःति थ्यंबलय् अस्पतालय् बेड खालि मन्त, एम्बुलेन्स सःतेबलय् इलय् मथ्यनाः गुलि मनूत अकालय् मन्त । गुलिं विरामीयात उखें थुखें अस्पतालय् जक ब्वाकु ब्वाकुं गनं हे भर्ना मकाःसे, उपचार याय्मखनाः लँय् हे सित । थज्याःगु अवस्थाय् संक्रमणया नियन्त्रण व थःगु कर्तव्यं बिस्युं वनेत स्वइपिन्त कारवाहीया खँय् तकं सरकार कडा रुपं प्रस्तुत जुइमाःगु खः ।
तर थन सरकार थः हे जिम्मेवारीं बिस्युं वनेत स्वःगु थें खने दयाच्वंगु दु । उपचार मयाइपिं स्वास्थ्यकर्मी, अस्पतालयात कारवाही याय्गु ला गन खः गन, सरकारं हे बेहोस जूसा वा बेहोस जुइ थें च्वंसा जक अस्पताल हुँ धाइगु । फयांफत्तले परिक्षण हे मयाइगु स्थिती दु । १८द्वः परिक्षणया क्षमता दय्केधुन धकाः फुइँ क्यनीगु सरकारं आः वयाः खुद्वः, न्हय्द्वः नमूना जक परिक्षण यानाच्वंगु दु । सरकारया नेतृत्व यानाच्वंपिं ला पदया ल्वापुइ हे तक्यनाच्वंगु दु ।
देशय् संक्रमणया स्थिती गथे दु, स्वय् तकं लाः ला मलाःला मस्यू । खोप वइबलय् नं थःथः मनूतय्त बीत नं हानथाप जुइगु खँय् आपाःसिया शंका दु । सरकार थःगु ज्याय् गम्भीर जुयाः न्ह्याःवंसा लिपाया चुनावय् नं बांलाःगु हे लिच्वः पिकाय्फइला । मखुसा जनतां ला न्ह्याबलें थःगु हिसाब तया हे च्वं धइगु थीथी ईया राजनैतीक परिवर्तनं क्यने हे धुंकल।
