सरस्वती प्रधानया त्वःतल
बछलाथ्व पुन्हि ११४१, असार १० बिहीवाः
जातीय भेदभाव यानाः दलितयात क्वथा बालं मबिउगु द्वपनय् ज्वनातःम्ह मय्जु सरस्वती प्रधानयात त्वःतूगु दु ।
येँ जिल्ला अदालतं प्रमाण मगाः धासें मुद्दा हे मन्ह्याकुसे वय्कःयात म्हिगः त्वःतूगु खः । प्रहरीं स्वन्हु हिरासतय् तयेधुंकाः वय्कःयात बुधवाः अदालतय् पेश याःगु खःसा जिल्ला अदालतया सरकारी वकिलं प्रमाण हे मगाः धासें मुद्दा हे दर्ता मयासें त्वःतूगु खः ।
प्रहरीं स्वन्हु हिरासतय् तयाः याःगु अनुसन्धानया फाइल सरकारी वकिलयात बुझे याःगु खःसा सरकारी वकिलं प्रमाण मगाः धकाः फाइल प्रहरीयात हे लितबिउगु खः । सञ्चारकर्मी रुपा सुनारं थःत कामी जूगुलिं क्वथा बालं मबिउगु धकाः मय्जु प्रधानविरुद्ध उजुरी तःगु खः ।
प्रधानयात प्रहरीं स्वन्हु हिरासतय् तयाः अनुसन्धानया निंतिं सुनारं रेकर्ड याःगु टेलिफोनया अडियो बिउगु खः, तर सरकारी वकिलं थुकीया फोरेन्सिक जाँच यानाः प्रमाणित मजूनिगुलिं प्रमाण मगाः धकाः धाःगु खः ।
सरकारी वकिल कार्यालयया सहायक जिल्ला न्यायाधिवक्ता चन्द्रप्रसाद संजेलं प्रमाण मगाःगुलिं थप अनुसन्धान यायेत धयागु धकाः धाःगु दुसा थ्व मुद्दा न्ह्याकेगु व खारेज यायेगु धयागु बारे निर्णय धाःसा मजूनिगु खँ वय्कलं धयादीगु दु ।
Categorized in राष्ट्रिय
