सरिताया ग्वाहालिया नितिं ‘होप’
लहनान्यूज | गुंलागा अष्टमि ११३७ (अगष्ट १५ २०१७)
थः अबुयात स्येँ दान यायेधुंकाः न्हियान्हिथंया वासः यायेगु लिसें छेँ न्ह्याकेगुलिइ आर्थिक समस्या फया वयाच्वंम्ह सरिता महर्जनया ग्वाहालिया नितिं नेपाः डान्स एकेडेमिया कलाकारत छप्पं जुयाः न्ह्यज्याइगु जूगु दु ।
महर्जनया ग्वाहालिया नितिं एकेडेमिं थ्व हे वइगु भदौ ३ गते दरवारमार्ग स्थित क्लब डेजाभुइ सांगितिक ज्याझ्वः ‘होप’या ग्वसाः ग्वयेत्यंगु दु ।
अबुया स्येँ प्रत्यारोपण धुंकाःया वासः, जँलास्येँ सम्बन्धि समस्याया वासः याकाच्वंम्ह मांया वासः लिसें थःगु हे नं वासः यायेत न्हियान्हिथं यक्व हे खर्च यानाच्वनेमाःबलय् येँया लगं त्वालय् च्वंम्ह सरिता महर्जन आः तःधंगु आर्थिक समस्याय् लानाच्वंगु दु ।
न्हापा बुटिक न्ह्याका वयाच्वनादीम्ह सरिता आः थःगु हे स्वास्थ्य सम्बन्धि समस्याया हे हुनिं थत्थें छुं ज्या यायेमफइगु अवस्थाय् वय्कःया छुं आयश्रोत नं मदु ।
‘खयतला सरिता जिमिगु हे एकेडेमिया पुलांम्ह विद्यार्थी नं खः । तर सरितायात समस्याया दथुइ मेगु समस्या जुयाच्वंगु थुज्वःगु इलय् मानवताया नातां वय्कःयात ग्वाहालि यायेगु झी सकसिगुं कर्तव्य खः’ एकेडेमिया नायः रोहिया महर्जनं धयादिल । उगु ज्याझ्वलं मुनीगु धेबा सरितायात लःल्हायेगु नायः महर्जनं जानकारी बियादिल ।
ज्याझ्वलय् नेपाःया नांजाःपिं कलाकार लिसें नेपाः डान्स एकेडमीया कलाकारपिनिगु पाखें थःगु कला न्ह्यब्वइगु ज्याझ्वः कजि रीना महर्जनं जानकारी बियादिल । ‘थुगु ज्याझ्वःपाखें छुं भचा ग्वाहालि बियाः सरिताया मांअबुया वासः यायेत लिसें भविष्यय् वय्कःयात छुं आयमूलक लजगाः न्ह्याकेत नं तिबः जुइमा धइगु जिमिगु आज्जु खः’ कजि महर्जनं ज्याझ्वःया आज्जु कनादिल ।
नेपाः डान्स एकेडेमिं नेपाः म्यूजिक व क्लब डेजाभुलिसेया सहकार्यय् थुगु ज्याझ्वःया ग्वसाः ग्वयेत्यंगु खः । ‘छगू पवित्र संकल्प लिसेंया सामाजिक आज्जुं थुगु ज्याझ्वःया ग्वसाः ग्वयेत्यनागु दु । जिमिगु थ्व सामाजिक आज्जुइ, सकसिगु ग्वाहालि दइ धइगु आशा कयागु दु’ ज्याझ्वःया व्यबस्थापक गम्भिर मान सिंहं धयादिल ।
Categorized in मनोरन्जन
