सरोदवादक सुदर्शन राजोपाध्याययात भारतया राजस्थानय् सम्मान
लहनान्युज | दिल्लागा पारु ११३९ (जुलाई १७ २०१९)
नेपाःया वरिष्ठ सरोदवादक लिसें म्ये हालामी उस्ताद यसराज सुदर्शन राजोपाध्याययात भारतया राजस्थानय् सम्मान यागु खः । वःगु आइतवाः जुलाइ १४ तारिख कुन्हू राजस्थान, जयपुरया जगतपुराय् च्वगु सुरेश ज्ञान विहार विश्वविद्यालय् जुगु अन्तर्राष्ट्रिय मैत्री सम्मेलनय् राजोपाध्याययात इन्टरनेशनल इन्डिएन बेस्टिज अवार्ड २०१९ लःल्हागु खः ।
आर वि फाउन्डेशन व भव्या इन्टरनेशनलया ग्वसालय् कलाकार मंचया संयोजनय् जुगु मैत्री सम्मेलनय् वयकयात मुंवईया समाजसेवी लिसें व्यवसायी सुरेश अग्रवालं बेस्टिज अर्वाड लःल्हानादिगु खः ।
असमया नाजाम्ह सामाजिक अभियन्ता शंकरलाल अग्रवालया अध्यक्षताय् जुगु ज्याझवलय् सुरेश ज्ञान विहार विश्वविद्यालयया अध्यक्ष सुनील शर्मा, कलमकार मंचया संस्थापक शैलेन्द्र माथुर,मंचया निर्देशक डा निशा माथुर लगायतया ब्वति दुगु खः । ज्याझवलय् नेपाल नाप भारत, मालदिभ्स,क्यानाडा लगायतया देयपाखें न ब्वति दुगु खः।
अथेहे, मैत्री सम्मेलनया ज्याझवलय् सुर्दशन राजोपाध्यायया विशेष सरोद वादनया प्रस्तुति लिसे साहित्यिक सफू विमोचन लगायतया ज्याझवः न जुगुु खः ।
स्वंगु दशक न्हयः निसें संगित साधना याना च्वनादिम्ह सरोदवादक राजोपाध्याययात थ्व स्वया न्हयः सन् २०१३ य् भारतया पश्चिम बंगाल सरकारपाखें संगित मंजरी उपाधि प्रदान यागु खसाः सन् २०१५ य् भारतया गुजरातय् सुरिल साँझपाखें स्वर्णपत्र लःल्हागु खः ।
नेपाःया सन्दर्भय् वयकल रेडियो नेपालपाखें सन् २००२ य् जुगु जिल्लाव्यापी संगित प्रतियोगितय् न्हापं सिरपा कयादिगु खसाः शास्त्र सम्मान २०१८, सेभ दी नेशन अवार्र्ड लगायतया आपालं सिरपा लिसें सम्मानं कयादिगु दु ।
सरोदवादन बाहेक वयकःया नेपालीइ पलपल, पानीसरी , त्यो रात, नेपाल भाषाय् नसला, हसना, छन्हु निन्हू, छगू मतिना, शास्त्रीय संगितपाखें वन डेरागाज, सोलफूल म्यूजिक फर मेडिटेशन , भारतं सुरिल म्यूजिक इन २०१५ लगायत पिहा वये धुकुगु दु ।
