सर्वाेच्चयात प्रधानमन्त्री ओलीया लिसः
बछलागा पञ्चमी, ११४१, असार २५ शुक्रबाः
प्रधानमन्त्री केपी शर्मा ओलीं मन्त्रिपरिषद् विस्तार याःगु सम्बन्धय् सर्वोच्च अदालतय् थःगु लिखित लिसः लःल्हानादीगु दु ।
मन्त्रिपरिषद् गठन व मन्त्री ल्यःगु सम्बन्धी विषय संविधानं प्रधानमन्त्रीया स्वविवेकं यायेदइगु उल्लेख यानातःगु धकाः ओलीं दाबी यानादीगु दु । कामचलाउ सरकारं याःगु मन्त्रिपरिषद् विस्तारविरुद्ध सर्वोच्चय् रिट लाःगु खः ।
ओलीया पलाःयात अदालतं अन्तरिम आदेशमार्फत खारेज यानाः प्रधानमन्त्रीलिसे लिखित लिसः फ्वंगु खः । ओलीं १७गू बुँदे लिसः अदालतय् लःल्हानादीगु दु । प्रतिनिधिसभा विघटन जूगु ईया प्रधानमन्त्रीं मौजुदा मन्त्रिपरिषद्यात बिस्तार यायेत, कार्यविभाजन यायेत अले छुं न मन्त्रालयया जिम्मेवारी सुं न मन्त्रीयात बीदइगु उल्लेख यानादीगु दु ।
अथेहे वय्कलं मन्त्रिपरिषद् विस्तारविरुद्ध सर्वोच्चं अन्तरिम आदेश जारी जूगु संविधान अःखः जूगु धयादीगु दु । देय्या शासन व्यवस्था कार्यकारीं न्ह्याकेमाःगु अले अन्यागु ज्याय् ब्वलनीगु समस्यायात कार्यकारीं हे ज्यंकेमाःगु लिसलय् उल्लेख यानादिल ।
अथेहे कार्यकारीयात मन्त्रिपरिषद थपघट यायेदइगु अधिकार दुगु न प्रधानमन्त्रीं सर्वोच्चयात च्वःगु लिसलय् उल्लेख यानातःगु दु । प्रतिनिधिसभाया निर्वाचनया नितिं प्रतिनिधिसभा विघटन जूगु मितिं ६लायादुने निर्वाचन यायेमाःगु जुयाः प्रतिनिधिसभा विघटन जूगु अवस्थाया प्रधानमन्त्रीं हे मौजुदा मन्त्रिपरिषद्यात विस्तार यायेत, कार्यविभाजन यायेत अले छुं न मन्त्रालयया जिम्मेवारी सुं न मन्त्रीयात जिम्मेवारी बीफइगु धयादीगु दु ।
Categorized in राजनीति
