२०८० चैत्र १५, बिहिबार

सर्वोच्च अदालतया न्यायाधीशलिसें निगू दर्जनयात कोरोना संक्रमण

थिंलागा पुन्हि ११४२, माघ ३ सोमवाः

सर्वोच्च अदालतया न्यायाधीश मीरा खड्कालिसें २४म्हेसित कोरोना पुष्टि जूगु दु ।

सर्वोच्च अदालतया प्रवक्ता बाबुराम दाहालया कथं न्यायाधीश खड्का, मुख्य रजिष्ट्रार लालबहादुर कुँवरलिसें २४म्हेसित कोरोना पुष्टि जूगु खः । कोरोना जूगु आशंकाय् ३० कर्मचारीं परीक्षण याकूगुलिइ अप्वःसित लक्षण खनेदुगु प्रवक्ता दाहालं धयादिल ।

न्यायाधीश, मुख्य रजिष्ट्रारलिसें कर्मचारीयात कोरोना संक्रमण पुष्टि जुइधुंकाः सर्वोच्चया न्हियान्हिथंया ज्या प्रभावित जूगु दु । प्रवक्ता दाहालया कथं कोरोनां संक्रमित जूपिं कर्मचारीया ल्याः अप्वःगुलिसें कन्ट्याक्ट ट्रेसिङय् लाःपिन्त परीक्षण याकेत व लिच्वः मवःतल्ले सजग जुइत धाःगु दु ।

कर्मचारीयात कोरोना पुष्टि जूगुलिसें पेशी व्यवस्थापननिसें रिट निवेदन दर्ता, रुजुलिसेंया ज्याय् समस्या जूगु दु । आइतबाः स्वाब ब्यूपिनिगु रिपोर्ट वयेधुंकाः जक कर्मचारीया व्यवस्थापन गुकथं यायेगु धइगु विषयस सहलह जुइगु जूगु दु ।

नेपाल बार एसोसिएसनय् आबद्ध थीथी वरिष्ठ अधिवक्ता व अधिवक्तातय्त नं कोरोना संक्रमण पुष्टि जूगु दु । वरिष्ठ अधिवक्ताद्वय हरिहर दाहाल व कृष्णप्रसाद भण्डारीलिसें २० स्वयां अप्वःसित कोरोना संक्रमण पुष्टि जूगु खः ।

सरकारं नारा जुलुस यायेत बन्देज तःगु जूसां सर्वोच्च अदालत परिसरय् नेपाल बार एशोसिएसन, सर्वोच्च अदालत बारलिसें नं वंगु ७८न्हु न्ह्यःनिसें आन्दोलन यानाच्वंगु दु ।

Categorized in राष्ट्रिय