सर्वोच्च अदालतया न्हापांम्ह मिसा न्यायाधीश सिलु सिंह मन्त
नेपाःया सर्वोच्च अदालतया न्हापांम्ह मिसा न्यायाधीश सिलु सिंह म्हिगः मन्त । मदुम्ह सिहं छवाः न्ह्यः आकाझाकां ‘ब्रेन एटेक’ जुयाः मेडिसिटी अस्पतालय् वासः याना वयाच्वंगु खः ।
अस्पताल भर्ना यासांनिसें अचेत जुयाच्वंगु खःसा म्हिगः अचेत अवस्थां तुं मदुगु खः ।
 
मदुम्ह सिहं ८४ दँ दुम्ह खः । मयजु सिंह नांजाःम्ह वाम बुद्धिजीवी एवं समालोचक प्रो. माणिकलाल श्रेष्ठया जहान लिसें नेपालभाषाया न्हापांगु न्हिपौ ‘नेपालभाषा पत्रिका’ या सम्पादक प्रकाशक फत्तेबहादुर सिंहया म्ह्याय् खः ।
 
मदुम्ह सिंहं अल इण्डिया रेडियोय् नेपालभाषां समाचार वाचन यायेगु ज्या नं यानादीगु खःसा नेपालभाषा पत्रिकाय् गबलें गबलें नेपालभासं च्वयेगु ज्या नं यानादीगु खः । वयकः नेपाल बार एशोसियसनया पुलांम्ह उपसभापति नं खः ।
 
मदुम्ह सिहंया निम्ह कायपिं दु ।