ससफो चन्द्रागिरिइ रणजितया नेतृत्व
लहनान्यूज | चिल्लागा एकादशी ११३७ (मार्च २४ २०१७)
संघीय समाजवादि फोरम नेपाल चन्द्रागिरि नगर तदर्थ समितिया न्हूम्ह नाय कथं रणजित चन्द्र प्रधानयात ल्यःगु दु ।
ससफो चन्द्रागिरि नगर तदर्थ समितिया सतुंगलय् क्वचाःगु न्हापांगु तःमुँज्यां समितिया न्हूगु ज्यासना पुचलय् भाइराम श्रेष्ठयात न्वकू ल्यःगु दु । अथे हे छ्यान्जेय् कमल शेरचनयात व ल्यू छ्यान्जे कान्छा महर्जनयात ल्यःगु दु ।
व हे कथं दांभरिं कथं देव महर्जनयात ल्यःगु दु । दुजलय् इन्जु श्रेष्ठ, तारा महर्जन, राजन श्रेष्ठ, सीताराम देवाली, कुलानन्द चौधरी, सुरेन्द्र श्रेष्ठ, राजेश श्रेष्ठ, महेश्वर श्रेष्ठ व रीता यसमाली च्वनादीगु दु ।
व स्वयां न्ह्यः समितिया नायः राजन शाक्यया अध्यक्षताय् उलेज्या सत्र ज्याझ्वः जूगु खः ।
उलेज्या सत्रय् ससफो नेपालया केन्द्रिय दुजः लिसें येँ जिल्ला इन्चार्ज रमेशचन्द्र प्रधान, ससफो नेवाः प्रदेशया नायः न्हुच्छेलाल महर्जन, येँ जिल्ला नायः मनरत्न शाक्यं थःथःगु नुगः खँ तयादीगु खः । ज्याझ्वलय् वक्तापिन्सं संविधान संशोधन मजुइकं स्थानीय चुनाव याये मज्यूगु खँय् बः ब्यूगु खः ।
Categorized in राजनीति
