ससफो नेपाल चुनावय् वंगुलिइ आपत्ती
लहनान्यूज | बछलाथ्व अष्टमि ११३७ (मे ४ २०१७)
संघीय समाजवादि फोरम नेपालं स्थानीय तहया चुनावय् ब्वति कायेगु खँय् थःगु गम्भीर ध्यानाकर्षण जूगु नेपाः राष्ट्रिय पार्टिं न्ह्यथंगु दु ।
नेपाः पार्टिं थौं विज्ञप्ति जारी यासें ससफो नेपालं स्थानीय तहया चुनावय् ब्वति काःगु खँय् आपत्ती प्वंकूगु खः ।
परिमार्जन लिसें संविधान संशोधनया माग याना वयाच्वंगु संघीय गठबन्धनया छगू घटक नेपाः पार्टिं ससफोया नायः उपेन्द्र यादवं यकःति ढंगं न्ह्याःवंगु धाःगु खः ।
ससफो नायः यादवं यकःति निर्णय यानाः स्थानीय तहया चुनावय् ब्वति कयाः मुक्कं मधेस व आदिवासी जनजातितयत धोका ब्यूगु पार्टिया वक्तव्यय् न्ह्यथनातःगु दु ।
न्हापा केन्द्र व प्रादेशिक तहया चुनाव जुइमाःगु थःपिनिगु मागयात ल्यूने त्वःताः स्थानीय चुनावय् ब्वति कयाः यादवं मधेस आन्दोलनया शहिदतयत अपमान याःगु नं वक्तव्यय् धयातःगु दु ।
उगु हे वक्तव्यय् नेपाः पार्टिं छुं नं पार्टिलिसे तालमेल यानागु मदुगु धयातःगु दु । परिमार्जन लिसें संविधान संशोधनया थःपिनिगु माग यथावत दनिगु धासें थःपिं चुनावय् वनेत्यंगु धइगु हल्ला निराधार व हल्ला हे जक खःगु नं विज्ञप्तिइ उल्लेख यानातःगु दु
