सहकारी कपया उपाधि सजिनयात
नृपेन्द्रलाल श्रेष्ठ | दिल्लाथ्व षष्ठी ११३९ (जुलाई ८ २०१९)
ताम्रकार समाज व ललितपुर स्पोर्टस् क्लबया मंकाः ग्वसालय् जूगु न्हय्क्वःगु गणेशमान सिंह सहकारी बुद्धिचाल कपया उपाधि जनता साकोसया सजिन महर्जनं त्याकल । फाइनलय् गोल्डेन गेट इन्टरनेशनल कलेजया मिलन लामायात बुकाः महर्जनं उगु उपाधि त्याकूगु खः । उपाधिया नापनापं यामाहा मोटरसाइकल नं त्याकूगु दु । निगूगु थासय् लाःम्ह मिलन लामां न्यय्द्वःतका त्याकूगु दु ।
कासाय् पुलांम्ह नेपाल च्याम्पियन शुभकामना साकोसया मदनकृष्ण कायस्थ स्वंगूगु थासय् लाःगु दुसा रिजेन्द्र राजभण्डारी प्यंगूगु थासय् लात । कायस्थ व राजभण्डारीं छसिकथं स्वीद्वः व नीन्याद्वःतका त्याकल ।
अथे हे लिग कम नकआउटया आधारय् न्ह्याःगु उगु कासाया लिगपाखे फिडे मास्टर रुपेश जैशवालं उपाधिया नापनापं २५द्वःतका त्याकल । वय्कलं पुलांम्ह नेपाल च्याम्पियन नवीन तण्डुकारयात बुकूगु खः ।थ्व हे झ्वलय् मिसापाखे विनिता कपालीं उपाधिया नापं १०द्वः तका त्याकल ।
ललितपुर स्पोर्टस् क्लबया नायः हेराकाजी महर्जनया सभाध्यक्षताय् जूगु सिरपाः तथा समापन ज्याझ्वलय् नेपाल ओलम्पिक कमिटीया नायः सांसद जीवनराम श्रेष्ठं विजेता कासामिपिन्त ट्रफि व दां लःल्हानादीगु खः ।
३७गू जिल्लाया १००म्हकासासमिपिन्सं ब्वति काःगु उगु कासा वंगु असार १६गतेनिसें न्ह्याःगु खः ।
