युक्रेनं थःगु सीमाय् तनाव अप्वयेधुंका रुसलिसे वार्ताया प्रस्ताव याःगु दु ।

युक्रेनया बिदेशमन्त्री दिमिट्रो कुलेबां रुसी अधिकारीत व युरोपेली सुरक्षा पुचःया दुजःतयेत ४८ घौया ई सीमा दुने वार्ताया नितिं ब्वनादीगु खः । बिदेशमन्त्री कुलेबां युक्रेनप्रतिया रुसी योजना पारदर्शी जुइमाःगु धका वार्ताया कुतनः जूगु धयादीगु दु ।

युक्रेनया सीमाय् छगू लख अप्वः रुसी सेनाया तैनाथी लिपा युक्रेन व रुस दथुइ ल्वापु जुइफइगु ग्याचिकु दथुइ युक्रेनं वार्ताया प्रस्ताव तःगु खः । अयेसां रुसं युक्रेनयात वार्ताया प्रस्तावया खँय् छुं नं लिसः बिउगु मदुनि ।

थ्वयान्ह्यः युक्रेनं भियना सम्झौताया भ्वँया खँय् अध्ययन यायेत रुसयात इनाप याःगु खः । युक्रेनयात पश्चिमा देय्तयेसं रुसं याये फइगु हताःया नितिं सचेत जुइत तक्वःमछि अपिल यायेधुंका युक्रेन सशंकित जूगु दु ।

थ्वयान्ह्यः हलिंया छगू दर्जन सिवें अप्वः देय्तयेसं युक्रेनय् दूगु थःपिनि नागरिकयात लितयेंकेधुंकुगु दु । नेटोय् युक्रेनयात आवद्ध याःगु विषयलय् रुष्ट जूगु रुसं युक्रेनयात हःताः यायेगु योजना दयेकाच्वंगु आशंका याःसा नं रुसं धाःसा खण्डन यानावःगु दु ।

Categorized in अन्तर्राष्ट्रिय