२०८० चैत्र १५, बिहिबार

सांसदतय्‌गु थ्व गजाःगु पहः

 
येँया नक्सालय् जगदम्बा हस्पिटालिटीं दयेकाच्वंगु ‘होटल ट्रि हिल्टन’यात कयाः सांसदतय्‌सं थःगु खँग्वः हिलाहःगु दु । अब्यवस्थित शहरीकरणं यानाः कुरुप जुजुं वनाच्वंगु येँय् थनया भौगोलिक अवस्थायात बिचाः मयासें नक्सा पास यायेगु ज्या व उकिया लिच्वःपाखें जनता नापं शहरयात गुकथंया लिच्वः लानाच्वंगु दु धइगु छगू दसु जुयाब्यूगु दु, थुगु होटल । थुगु होटल दयेकेगु ज्या न्ह्याकेमलावं हे दिकेमाःगु अवस्था ब्वलंगु खः ।
 
छाय्‌धाःसा थुगु होटलया संरचना दयेकेत म्हूबलय् सतक भासे जूगु जक मखु जःखःया छेँया जगय् तकं लिच्वः लाःगु दु । थुकियात कयाः हे थुकथंया संरचना दयेकेमज्यू व थुकियात दिकेमाः धकाः सः थ्वःगुलिं व्यवस्थापिका संसदया सुशासन तथा अनुगमन समितिं सांसद ध्यान गोविन्द रञ्जितया संयोजकत्वय् छगू समिति दयेकूगु खः ।
 
थुगु संरचनां याःगु क्षति व भविष्यय् लाकेफइगु लिच्वःयात ध्यानय् तयाः, नापं स्वनिगलय् थजाःगु संरचना दयेकेत स्वीकृति बीगु ज्याय् तसकं गहन बिचाः यायेमाःगु खँय् बः ब्यूसें सांसदतय्‌सं थुकियात कयाः विरोध याःगु जक मखु, थुकियात तत्काल दिकेमाः धकाः विरोधया सः थ्वयेकूगु खः । उकिया हे लिच्वःकथं समिति नीस्वनेगु ज्या जूगु खः ।
 
जनताया आशा थ्व खः कि गुगु संरचना दयेकाच्वंगु खः, आः उकियात दिकेत उजं बी, व थःपिं सुरक्षित जुइगु आशा ब्वलंगु खः, तर सांसदतय्‌सं हे खँ हिलेवं आः धाःसा थुकियात कयाः जनतां सांसदतय्‌ स्वयेगु दृष्टिकोण हे हिलावंगु महसूस याःगु दु । 
 
व्यवस्थापिका संसदया सुशासन तथा अनुगमनं समितिइ सांसदतय्‌सं हिल्टन होटल दयेकाच्वंगु ज्याय् पंगः थनेमज्यू धकाः सः थ्वयेकूगु दु । संयोजक ध्यानगोविन्द रञ्जितलिसें दुजःपिं उदय नेपाली श्रेष्ठ, अकवाल अहमद शाह व अमनलाल मोदीं होटल दयेकेत अनुमति बीगु हाकनं थुकियात हे दिकेत आदेश बीगु, थ्व छु पहः खः धकाः न्ह्यसः तयेवं सकलें अजूचाःगु खः ।
 
 
अखतं सांसदतय्‌सं निर्माण यानाच्वंगु कम्पनीं क्षतिपूर्तिया नितिं सरकारयात मुद्दा तल धाःसा थुकिया क्षतिपूर्ति सरकारं बीमाःगु अवस्था वइगु खँ नं धाःगु दु । तर अजूचायापूगु खँ छु धाःसा वंगु माघ २८ गते च्वंगु समितिया मुँज्याय् उमिसं हे जगदम्बां थःत माःकथंया जग्गा मगाय्‌वं जबरजस्ती गाः म्हूगु, सर्वसाधारणतय्‌ छेँय् क्षति जूगु, लँ स्यंगु धकाः सः थ्वयेकुसें मापदण्ड अःखः थजाःगु छेँ दयेकेबी मज्यू धकाः सः थ्वयेकूगु खः ।
 
उमिसं हे आः वयाः सतक दयेकेगु ज्या मजबूत मजूगुलिं थजाःगु परिणाम वःगु खः धकाः सतक विभागया लापरवाही जूगु खँ न्ह्यथनेत तकं लिचिलामदी । वंगु फागुणय् जक येँ महानगरपालिका व सतक विभागं जगदम्बायात पौ च्वसें सतक मदयेकूतलय् व पीडिततय्‌सं क्षतिपूर्ति प्राप्त मजूतलय् होटल दयेकेगु ज्या बन्द याये उजं ब्यूगु खः ।
 
संयोजक सांसद ध्यानगोविन्द रञ्जितं न्हापा पत्रपत्रिकाय् वःगु समाचार स्वयाः आवेगय् वयाः थःपिन्सं उकथं अभिब्यक्ति बियागु धकाः धाये नं लिचिला मदी । हिल्टनयात कारवाही यायेगु वा मयायेगु धकाः समितियात प्रतिवेदन लःल्हायेगु जुइ धकाः जानकारी बियादिल ।
 
सांसदतय्‌गु थजाःगु अभिब्यक्तिं यानाः गुलितक विश्वास यायेगु खः धइगु चर्चा परिचर्चा शुरु जूगु दु । हिल्टन होटलया निर्माण दिके हे म्वाःगु खःसा न्हापा लोकप्रियताया नितिं जक न्ववानादीगु खःला ? समिति दयेके न्ह्यः कारवाही याये माग यानादीपिं सांसदतय्‌सं आः ज्या दिकेमज्यू धकाः अखतं सरकारयात ख्याच्वः बीत तकं लिमच्यूगुलिं गजाःगु अदृष्य शक्तिं भूमिका म्हिताच्वंगु खः धकाः आम जनतां शंका यानाहःगु दु । सांसदतय्‌गु थजाःगु पहलं सांसद पदया हे गरीमा कुहांजक वनीगु मखुला धकाः न्ह्यसः नं थनाहःगु दु ।