सांसद भूमिकायात जनतां युगयुग तक लुमंकी : जनकवी श्रेष्ठ
नृपेन्द्रलाल श्रेष्ठ | एकादशी ११३९ (मार्च १७ २०१९)
सङ्घीय समाजवादी फोरमया सहअधक्ष्य लिसें प्रतिनिधिसभाया सांसद राजेन्द्र प्रसाद श्रेष्ठयात वय्कलं पहिचान व संघीयताया आन्दोलनलिसें नेवाः आन्दोलनय् यानादीगु योगदानयात कदर यासे येँया लाय्कुलिइ छगू तःजिगु ज्याझ्वः याना थीथी नेवाः संस्थातपाखें मंकाः कथं हंःगु दु ।
वयकलं ताः ई न्ह्यवंनिसें जुयाच्वंगु नेपालभाषा आन्दोलनया मागयात देय्या संघीय संसदय् सः तयेगु लिसें सरकारं हःगु विधेयकय् मांभासं आखः ब्वनेगु खःसा सम्बन्धित जातिं हे स्कूल चायेके माः धकाः हःगु विधेयकया विरोध यासे संघीय व्यवस्थाय् मां भाषं आखः ब्वंकेगु जिम्मेवारी सरकारं हे कायेमाः धकाः संशोधन प्रस्ताव तयाः पारित याकेत ताः लाःगु ख ।
सङ्घीय गणतन्त्रय् समेत नेपाल कम्युनिष्ट पार्टी नेतृत्वया सरकारं मांभासं आखः ब्वंकेगु निंतिं दायित्व कायेगु पल्सा संस्कृत शिक्षायात अलग विधा जुइगु यानाः विधेयक दर्ता याःगुलि वयकलं भाषिक उत्पीडनं मुक्तिया निंतिं विधेयकय् संशोधन दर्ता यानाः संस्कृत शिक्षायात शिक्षाया अलग विधा कथं स्थानीय तहलं चाय्कीगु स्कूलय् तकं महत्त्व बिया हःगु विधेयकं संस्कृत विधा लिकायेकेत विशेष भुमिका म्हिता दीगु खः ।
अथे हे भविष्यय् मुआब्जा ब्युसां जिइगु यानाः सतक विस्तारया नामय् नेवाःतय्त विस्थापित यायेछिंक सरकारं हःगु आवास सम्बन्धी विधेयकयात न राज्यया अधिनायवादी सोच धकाः विरोध याःसे वय्कलं संशोधन दर्ता याकाः पीडिततय् पक्षय् विधेयक संशोधन याकेत ताःलाःगु खः ।
ज्याझ्वलय् मूपाहां जनकवि दुर्गालाल श्रेष्ठजुं सांसद भाजु राजेन्द्र श्रेष्ठं जातीय मुक्ति आन्दोलनय् तःधंगु भूमिका म्हितूगु दु, मांभासं आखः ब्वंके दइ कथं कानुन दय्केत गुगु ऐतिहासिक भूमिका म्हितल व जनतां युगयुग तक लुमंकी धयादिसें मेपिं सांसदतसें न वय्कःया अनुकरण यायेमाः धया दिल ।
उगु हना ज्याझ्वलय् थःगु नुगः खँ न्ह्यब्वसे सांसद राजेन्द्र श्रेष्ठं नेवाःतय्गु लागां त्याका वंपिं अप्वःधइथें जनप्रतिनिधित ‘छेँय् धुं पिने छुं’ जुयाच्वंगु धासें झीगु न्ह्यनय् जि नेवाः खः, जिं थ्व याये व याये धाइगु तर थासय् थ्यन कि थःगु पार्टीं छुं धाइला धका जातीय उत्पीडनया विरुद्ध सः तय्त ग्याःगु खँ कना दिल । वय्कलं ’छुं’ प्रवृत्तिया मनूतसें समाजया निंतिं छुं हे यायेफइमखु धया दिल ।
नेता श्रेष्ठं पहिचान विरोधीतय्पाखें पहिचानया आशा याइपिंत संकेत यासे जनजाति मुख्यमन्त्री जुयाच्वंथाय् हे गण्डकी नां छुनाः पहिचानया आन्दोलनयात धोका बिउगु खँ कना दिल । वयकलं झीगु न्ह्यनय् माकक्क खँ ल्हाइपिन्त मखु उत्पीडित जनताया अधिकारया निंतिं सः तइपिन्त तिबः बिइ फयेके माः धासें थौंकन्हे ३ नम्बर प्रदेश नेवाःताम्सालिङ वा नेपालमण्डल जुइमाः धकाः हालां छु याये, ‘गोम्प ज्वना धम्प जाइमखु’ धया दिल ।
नेवाः न्ह्यलुवा श्रेष्ठं थःम्हं छुं तःधंगु ज्या मयानागु धासे नेपालभाषा आन्दोलनया कार्यकर्ता व नेवाः जुयागुया कर्तब्य जक पूवंकागु खँ कंसे संघीयता वये धुंका न्हापाथें फुक्क तगिंया शिक्षा केन्द्रया ब्वहलय् मजूसे प्रदेशया ब्वहलय् प्रदेश विश्वावद्यालय व उच्च शिक्षा अले स्थानीय तहया ब्वहलय् १२ गू कक्षा तकया माध्यमिक शिक्षा दुगु खँ कना दिल । वयकलं आः १२ गू कक्षा तक ब्वंकेगु लागि स्थानीय तहलं मांभासं आखः ब्वंकेगु स्कूल चायेकेत संघीय कानुन दयेके धुंगु खँ कना दिसे स्थानीय तहयात न्ह्यलं चायेकेगु ज्या यायेत न इनाप याना दिल ।
मंकाः ग्वसाः खलःया कजि भाजु श्रीकृष्ण मानन्धरया नायःसुइ जूगु उगु ज्याझ्वलय् नेवाः राजनीतिक अभियानया संरक्षक डा. महेशमान श्रेष्ठ, नेपालभाषा मिसा खलःया नायः मंगला कारंजीत, नेपालभाषा मंका खलः यलया नायः ऋपि प्रसाद श्रेष्ठ लगायतया वक्तापिसं न सांसद श्रेष्ठया भूमिकायात च्वछाया दिइगु खः । ज्याझ्व अभियानया छ्याञ्जे विद्या चित्रकारं न्ह्याकादीगु खःसा शिक्षा गुथिया नायः विष्णु चित्रकारं लसकुस यानादीगु खः ।
