सागय् भलिबलया कासा धलः सार्वजनिक
विकाश | कछलागा अष्टमी ११४०
१३क्वःगु दक्षिण एसियाली कासा (साग)या भलिबल कासा धलः सार्वजनिक जूगु दु। सागया मिजं लिसें मिसा निगुलिं पुचःया कासा धलः सार्वजनिक जूगु खः ।
मिसा व मिजं निगुलिं पुचःया समूह चरणय् नेपालया पुचलय् भारत व बंगलादेश लाःगु दु । मेगु पुचलय् माल्दिभ्स, श्रीलंका व पाकिस्तान लाःगु दु ।
त्रिपुरेश्वरस्थित कभर्डहलय् थ्व हे मंसिर ११ निसें १७ गतेतक्क कासा जुइत्यंगु दु ।
मिसा पुचःया कासाय् नेपालं ११ गते बंगलादेशलिसे म्हिताः सागया शुरुवात यायेत्यंगु दु । अथे हे, १३ गते शुक्रबाः भारतलिसे कासा क्वःज्यूगु दु ।
‘लिग कम नकआउट’या लिधंसाय् जुइगु कासाय् पुचःया शीर्ष निगू टोलीं सेमिफाइनलय् थाय् दयेकी ।
बंगलादेशय् छुं दिं न्ह्यःतिनि हे क्वचाःगु एभिसी सेन्ट्रल जोनया उपाधि त्याकूगु पुचः जूगुलिं नेपाली मिसा टोलींयात उपाधी दाबेदार टोली कथं कयाच्वंगु दु ।
सागया उलेज्या दशरथ रंगशालाय् मंसिर १५ गते जुइगु खः । भलिबलया कासात धाःसा ११ गतेनिसें हे न्ह्याइ ।
पुचलय् सु सु कासामि दुथ्याः ?
अरुणा शाहीया कप्तानीइ कोर्र्टय् कुहांवइगु नेपाली महिला टोलीइ प्रतिभा माली, सरस्वती चौधरी, निरुता ठगुन्ना, रेश्मा भण्डारी, पुनम चन्द, जानकी भण्डारी, सुनिता खड्का, सोफिया पुन, उषाकुमारी विष्ट, कमला पुन, सलिना श्रेष्ठ, उषा भण्डारी व हिरा केसी दु ।
अथे हे, इम बहादुर रानायाया कप्तानीइ कोर्टय् कुहांवइगु नेपाली मिजं भलिबल टोलीइ राजेन्द्र विष्ट, धनबहादुर भट्ट क्षेत्री, हरिहजुर थापा, टेकराज अवस्थी, हरि अधिकारी, दुर्गा खड्का, द्वारिका थापा, ईश्वर थापामगर, विनोद चन्द, विशाल विक, शरणसामरी क्षेत्री, कुलबहादुर थापा व रविन चन्द लाःगु दु ।
Categorized in कासा
