साग क्वःछिनातःगु इलय् हे जुइगु : राखेपया सदस्य सचिव सिलवाल
लहना न्यूज | ने.सं. ११३९ दिल्लागा दशमि (२८ जुलाइ, २०१९), सञ्चरवाः
राष्ट्रिय खेलकुद परिषद्या सदस्य सचिव रमेश सिलवालं दक्षिण एशियाली खेलकूद (साग) क्वःछिनातःगु इलय् हे जुइगु धयादिसें उकियात कयाः आशंका मयायेत इनाप यानादिल ।
नेपाल खेलकूद पत्रकार मञ्चं थौं सञ्चरवाः ग्वसाः ग्वःगु छगू ज्याझ्वलय् न्ववानादिसें सदस्य सचिव सिलवालं उकथं इनाप यानादीगु खः । वय्कलं कार्यविधि व पूर्वाधारया हुनिं कासा मदीगु नं धयादिल ।
परिषद्या सदस्य सचिव सिलवालं छुं छुं कासाया नितिं बैकल्पिक रंगशालाया व्यवस्था नं यानागुलिं कार्यविधि व पूर्वाधारया हुनिं कासा प्रभावित मजुइगु नं स्पष्ट यानादिल । कासाया ग्वसाः ग्वयेगु नितिं राष्ट्रं हे प्रतिबद्धता प्वंकेधुंकूगुलिं छुं नं त्वहः तयाः वपाखें लिचिले मज्यूगु तकं नं वय्कलं तयादिल ।
सिलवालं सार्वजनिक खरिद ऐन व कार्याविधिइ छुं छुं जटिलता दुसा नं थुकियात कयाः सम्बन्धित निकायस थःम्हेस्यां खँ तयेधुनागुलिं फाष्ट ट्राय्कपाखें जूसा नं कासा जुइगु दावी यानादिल ।
थ्व हे झ्वलय् सदस्य सचिव सिलवालं प्रधानमन्त्री, अर्थमन्त्री व खेलकूद मन्त्रीं बजेटया अभावय् कासा मदीगु आश्वासन बियादीगु नं जानकारी बियादिल ।
Categorized in कासा
