सानुकाजी विशेषाङ्क विमोचन जुल
लहनान्युज | चिल्लागा अष्टमी ११३८ (मार्च ९ २०१८)
नेवाः पत्रकारिता ख्यलय् न्हूगु लय्पौ पिदनीगु जूगु दु । नेवाःपत्रकार राष्ट्रिय दबू येँ जिल्लापाखें नेवाः जः लय्पौ पिदनीगु जूगु दु । थौं पत्रकार दबू येँ जिल्लां येँय् छगू ज्याझ्वः यासें नेवाः जः लय्पौ विमोचन याःगु दु ।
प्रदेश नम्बर ३य् येँ जिल्लापाखें प्रतिनिधि सभा व प्रदेश सभाय् निर्वाचित नेवाः सभासद् लिसें संचार ख्यलय् सक्रिय वरिष्ठ नेवाः पत्रकारपिन्सं मंकाः रुपं नेवाः जः लय्पौया सानुकाजी विशेषाङ्क विमोचन यानादिल । दच्छि न्ह्यः नेवाः पत्रकार राष्ट्रिय दबू, येँ जिल्लाया दांभरिं साुनकाज महर्जन मदुगु खः ।
ज्याझ्वलय् नुगः खँ तसें प्रदेश ३ क्षेत्र नम्बर ९ येँपाखें प्रतिनिधि सभाय् निर्वाचित सभासद् कृष्णगोपाल श्रेष्ठं राज्यपाखें संचार क्षेत्रय् उपलब्ध सुविधा धयागु नेवाः संचारकःमिपिनिगु नं अधिकार खःगु धयादिल । नेवाः संचारकःमिपिन्सं नं राज्यपाखें उपलब्ध स्वास्थ्य लगायतया थीथी सुविधा धयागु थःगु अधिकार कथं कायेमाःगु खँ सभासद् श्रेष्ठं न्ह्यथनादिल । ‘विशेष यानाः नेवाः संचारकःमिपिन्सं स्वास्थ्य सम्बन्धि समस्या जुइबलय् राज्यपाखें उपलब्ध सुविधा कायेगुपाखे ध्यान हे मब्यूगु खनेदु । व सुविधा धयागु ला नेवाः पत्रकारपिनिगु नं अधिकार खः ।’ सभासद् श्रेष्ठया धापू खः।
वरिष्ठ पत्रकार पुष्कर माथेमां नेवाः संचार ख्यलय् नेवाः पत्रपत्रिकात पिदनीगु तर निरन्तरताय् म्ह्वः हे जक खनेदयाच्वनीगु सन्दर्भ न्ह्यथनादिल । पत्रकार दबू थुज्वःगु संगठन विकास जुइधुंकूगु अवस्थाय् आः पिदनाच्वंगु पत्रिकार निरन्तर न्ह्यानाच्वनीगु लिसें दिनावंगु पत्रिकायात नं हाकनं निरन्तर याकेगु वातावरण दयेकेत न्ह्यज्यायेमाःगु धयादिल ।
पत्रकारतय्गु हकहितया सः थ्वयेकेत नीस्वंगु संस्थां नेवाः लय्पौ पिथनेगु ज्या याःगु खँय् पत्रकार दबूया केन्द्रिय नायः श्रीकृष्ण महर्जनं लसता प्वंकादिल । नेवाः जः लय्पौ सानुकाजी विशेषाङ्क पिथनाः छम्ह नेवाः पत्रकारयात अमर दयेकेत पत्रकार दबू येँ जिल्लां योगदान ब्यूगु नायः महर्जनया धापू खः ।
नेवाः जः लय्पौया सम्पादक लिसें पत्रकार दबू येँ जिल्लाया न्वकू बिराजकाजी राजोपाध्यायं संचार क्षेत्रयात राज्यया प्यंगूगु अंग कथं काइगु खँ न्ह्यथँसें आः देय् संघीयताय् वनेधुंकूगु अवस्थाय् प्रदेश ३ य् नेवाः संचार क्षेत्रया थाय्या विषयस नेवाः सभासद्पिन्सं बिचाः यायेमाःगु खँ न्ह्यथनादिल । नेवाः संचार ख्यःया लिसें नेवाः संचार सम्वद्ध संगठन, नेवाः संचार गृहयात ग्वाहालिया नितिं पहल यायेत न्वकू राजोपाध्यायं माग यानादिल ।
लसकुस न्वचु तसें पत्रकार दबू येँ जिल्लाया छ्यान्जे मदुम्ह पत्रकार सानुकाजी महर्जनया नेवाः संचार ख्यलय् ब्यूगु योगदानयात लुमंकुसें नेवाः संचारकःमिपिनिगु ग्वाहालिया नितिं सानुकाजी कल्याण कोष दयेकेधुनागु जानकारी बियादिल । उगु कोषय् ग्वाहालि यायेत नं छ्यान्जे शाक्यं आव्हान यानादिल । थ्वयां लिपा मदुम्ह सानुकाजी महर्जनया लुमन्तिइ मिडिया कप फुटसल यायेगु घोषणा नं शाक्यं उगु हे ज्याझ्वलय् यानादिल ।
पत्रकार दबू येँ जिल्लाया नायः नातिकाजी महर्जनं तःधंगु संचार गृहपाखें नं नेवाःलगायत जनजाति गतिविधिया समाचार प्रकाशन यायेगुलिइ च्यूताः क्यनेमाःगु धयादिल । नेवाः पत्रकारपिनिगु ग्वाहालि व नेवाः संचार गृहयात धिसिलाकायंकेत थःपिं न्ह्याब्लें क्रियाशिल जुयाच्वनेगु प्रतिवद्धता नायः महर्जनं प्वंकादिल ।
ज्याझ्वलय् प्रतिनिधि सभा सदस्य जीवनराम श्रेष्ठ, प्रदेश सभा सदस्यपिं बसन्त मानन्धर व राजेश शाक्य, पूर्व राज्यमन्त्री तीर्थराम डंगोल, वरिष्ठ पत्रकार सुरेशकिरण मानन्धर, राजु शाक्य व सुजीव वज्राचार्यलिसेंया उपस्थित दुगु खः ।
