साफ च्याम्पियनसिपया न्हापांगु कासाय् नेपाः व माल्दिभ्स दथुइ धेंधेंबल्ला
ञंलागा दशमी ११४१, असोज १५ शुक्रवाः
दक्षिण एसियाया दक्वःलय् तःधंगु फुटबल धेंधेंबल्ला साफ च्याम्पियनसिपया १३गूगु संस्करण थौनिसें माल्दिभ्सय् न्ह्यायेत्यंगु दु ।
मालेस्थित राष्ट्रिय फुटबल रंगशालाय् जुइगु धेंधेंबल्लाया न्हापांगु दिं निगू कासा जुइ । न्हापांगु कासाय् श्रीलंका व बंगलादेश दथुइ कासा जुइबलय् निगूगु कासाय् नेपालं ग्वसाःखलः लिसें साविका त्याकामि माल्दिभ्सलिसे म्हितिइ ।
नेपाः व माल्दिभ्स दथुया कासा नेपाली ई कथं चान्हय् ९ ता ई जुया ४५ गू मिनेटय् न्ह्याइगु जूगु दु । साफया थुगु संस्करणय् ५ गू देय्या ब्वति दुथ्यागु दु । थ्वखुसिइ ग्वसाःखलः माल्दिभ्स, नेपाल, भारत, बंगलादेश व श्रीलंकां उपाधिया नितिं धेंधेंबल्ला याइ ।
ब्वति काःगु फुक्क ५गू हे टोलीं पुचः चरणय् छखेरं मेखेरलिसे धेंधेंबल्ला याइ । लिग चरणया कासा लिपा शीर्ष निगू टोलीं उपाधिया नितिं असोज ३० य् धेंधेंबल्ला याइ ।
नेपाली टिम न्हापांखुसिइ साफ च्याम्पियनसिप त्याकेगु आज्जुलिसे माल्दिभ्स थ्यंगु दु । नेपाः आः तक्क साफया फाइनलय् थ्यने फुगु मदुनि ।
Categorized in कासा
