साफ च्याम्पियनसिपय् मल्दिभ्सया न्हापांगु जित
कौलाथ्व द्धितीया ११४१, असोज २२ शुक्रवाः
साफ च्याम्पियनसिप फुटबलय् ग्वसाःखलः माल्दिभ्सं न्हापांखुसि कासा त्याकूगु दु ।
म्हिगः जूगु कासाय् बंगलादेशयात २–० गोलं बुकाः माल्दिभ्सं फाईनल थ्यंकेगु सम्भावनायात म्वाकातःगु दु । माल्दिभ्सं कासा त्याकूबलय् हाम्जा मोहमद व अलि अस्फाकं छगोल छगोल याःगु दु ।
थ्व कासा त्याकाः माल्दिभ्सं २गू कासापाखें ३गू ल्या दयेकूगु दु । माल्दिभ्स ल्याधलःया स्वंगूगु थासय् थहाँवन । ज्वःलाक्क म्हितूगु कासापाखें ६गू ल्या दयेकूगु नेपाः शीर्ष थासय् थ्यंबलय् निगूगु थासय्च्वंगु बंगलादेशया ४गू ल्या दु ।
न्ह्यानाच्वंगु साफय् भारतया निराशाजनक ब्वज्या जुल । न्हापांगु कासाय् बंगलादेशलिसे १–१गोलाय ज्वलिंज्वः म्हितूगु भारत म्हिगः जूगु निगूगु कासाय् श्रीलंकालिसे गोल मजुइकं ज्वलिंज्वः यायेत बाध्य जूगु खः ।
मदिक्क निगू ज्वलिंज्वःलिपा उपाधिया दावेदार धयातःगु भारतयात दबाब लाःगु दु । च्याम्पियनसीपया स्वंगूगु कासाय् भारतं आइतवाः नेपाललिसे धेंधेंबल्ला याइ ।
