साफ च्याम्पियनसिपय् म्हितेत नेपाली फुटबल टोली माल्दिभ्स थ्यन
ञलागा सप्तमी ११४१, असोज १२ मंगलबाः
दक्षिण एसियाया दक्कले तःधंगु फुटबल कासा साफ च्याम्पियनसिपय् धेंधें बल्लाः यायेत नेपालया राष्ट्रिय फुटबल टोली म्हिगः माल्दिभ्स थ्यंगु दु ।
माल्दिभ्सया मालेय् थ्व हे असोज १५ निसें ३० गतेतक्क साफ च्याम्पियनसिप जुइत्यंगु दु । धेंधें बल्लाःया लागिं झण्डै निवाः कतारय् लिपांगु प्रशिक्षण याःगु नेपाली टोली म्हिगः अनं हे माल्दिभ्स थ्यंगु खः ।
नेपालं धेंधें बल्लाःया उलेज्या कासाय् थ्व हे असोज १५ गते ग्वसाः खलः देय् माल्दिभ्सलिसे म्हिती । ५ टोलीया ब्वति दुगु थुगुसीया साफ च्याम्पियनसिपया पुचः झ्वलय् दक्वं टोलीं छगुलिं मेगुलिसे म्हिती ।
पुचःया शिर्ष निगू टोली उपाधिया लागिं म्हिती । थुगुसी नेपाल व माल्दिभ्स लिसें उपाधि दावेदार भारत, बंगलादेश व श्रीलंकां साफय् ब्वति काःगु दु ।
नेपाल न्हापांगु खुसी साफ च्याम्पियनसिप म्हितेगु आज्जुलिसें माल्दिभ्स थ्यंगु दु ।
Categorized in कासा
