साफ च्याम्पियनसीप फुटबलय् थौं नेपाः व बंगलादेशदथुइ धेंधेंबल्ला
कौलाथ्व अष्टमी ११४१, असोज २७ बुधबाः
माल्दिभ्सय् न्ह्यानाच्वंगु साफ च्याम्पियनसीप फुटबल अन्तर्गत लिग चरणया लिपांगु कासाय् थौं नेपालं बंगलादेशनाप धेंधेंबल्ला यायेत्यंगु दु ।
कासा मालेस्थित राष्ट्रिय फुटबल रंगशालाय् नेपाली ई कथं सनिलय् जःछिपाः ५ताः ईलय् न्ह्याइ । बंगलादेशविरुद्ध ज्वलिंज्वः म्हितूसा वा कासा त्याकूसा नेपाः न्हापांखुसि साफया फाइनलय् थ्यनी ।
नेपाः आःतक साफया फाइनलय् मथ्यंनि । न्ह्यानाच्वंगु च्याम्पियनसीपय् पुचः चरणया कासालिपा शीर्ष निगू पुचलं फाइनलय् थाय् दयेकी । न्यागू पुचलं ब्वति काःगु च्याम्पियनसीपय् नेपाः ३गू कासापाखें ६गू ल्या दयेकाः निगूगु थासय् दु ।
शीर्ष थासय् दुगु माल्दिभ्सया न ६गू हे ल्या दु । भारत ५गू ल्यानाप स्वंगूगु थासय् दुसा बंगलादेश ४गू ल्यानाप प्यंगूगु थासय् दु । लिपांगु कासा भारत व माल्दिभ्सदथुइ जुइ ।
नेपालं थ्वसिवे न्ह्यः माल्दिभ्स व श्रीलंकायात बुकूगु खः । भारतलिसेया कासाय् धाःसा बूगु खः ।
Categorized in कासा
