साफ यू–१९ मिसा फुटबल च्याम्पियनसिपय् नेपालं थौं भारतविरुद्ध धेंधेंबल्ला यायेत्यंगु दु ।

बंगलादेशया ढाकास्थित शहिद सिपाही मुस्तोफा कमल स्टेडियमय् नेपालं भारतलिसे म्हितिइ । कासा नेपाली ई कथं न्हिने २ता ई जुया ४५गू मिनेटय् न्ह्याइ । भारतविरुद्ध मैदानय् कुहाँवइलबय् नेपाः जितया मालेज्याय् न्ह्याइ ।

नेपाः भारतयात बुका फाइनल थ्यनिगु योजनाय् दु । नेपालं ३ गू कासाय् २गू जित लिसें ७ गू ल्याः मुंकुगु दु । नेपाः शीर्ष थासय् दु । भारत ६ गू ल्याः मुंका ३गूगु थासय् दु । भारत नं नेपाःयात बुका फाइनल थ्यनेगु मनंतुनाय् दु ।

राउण्ड रोबिनया लिधंसाय् न्ह्यानाच्वंगु धेंधेंबल्लाया  शीर्ष निगू टिम फाइनलय् थ्यनिइ । नेपालं न्हापांगु कासाय् बंगलादेशलिसे गोल मयासें ज्वलिन्ज्वः म्हितुगु खःसा निगूगु कासाय् श्रीलंकायात  ६गू–०या गोल अन्तरं बुकुगु खः ।

३गूगु कासाय् नेपालं भुटानयात ४गू–०या गोल अन्तरं बुकुगु खः । भारतं न्हापांगु कासाय्  श्रीलंका  व निगूगु कासाय् भुटानयात बुकुगु खः । ३गूगु कासाय् भारत बंगलादेशलिसे बुगु खः ।

Categorized in कासा