सामाजिक सञ्जालया सूत्रधार – नातिदाइ
– प्रतिसरा साय्मि
झी नेपालभाषा ख्यः या आपालं पासापिनि दथुइ मोबाइल फोन ज्वना जुइगु चलन मदु बलय् निसें वने च्वनेगु मुनेगु थाय् खः नातिदाइया भोताहिति दगू बहाःया लब चाय् च्वंगु सफू पसः – सफू धुकू ।
पसः चिकी चाकू, तर ज्या आपालं जुइगु थाय् खः । नेपालभाषाया छुं नं कृति, पत्रिका, सूचं, ज्याझ्वः, भाषा ख्यःया सुं नं नाप लाय् माःसा, थःगु छुं बिचाः तय् माःसा, पत्रपत्रिकाय् च्वसु बीमाःसा, नेवाःएफ.एम. ज्याझ्वःलिसे स्वापू दुगु छुं नं न्ह्यसः लिसःया लिसः सम्बन्धित ज्याझ्वः न्ह्याकामियात बीमाःगु पौ त्वःते माःसा, स्वनिगःदुने, पिने च्वंपिं साहित्यकारपिन्त बीमाःगु सूचं, बुखँ आदि आदि आपालं आपालं ज्या जुइगु छगू नं छगू थाय् खः नातिदाइया “सफू धुकू” ।
थौंकन्हय् थें अबलय् मोबाइल, आइफोन, ल्यापटप आदि छ्यलेगु चलन मदु बलय् सकल भाषाह्यःमिपिं मुनेगु जंक्सन खः झीगु “सफू धुकू” । थौंकन्हय् थें फेसबुक, ट्वीटर, इन्स्टाग्राम, इमेल आदि अबलय् छ्यलाः अःपुक्क पौ, बिचाः, लिसः, सूचं आदि झीसं संचार माध्यमय् छ्वय् फूगु अवस्था मदुबलय् झी भाषा ख्यःयापिन्त धिसि लाःगु भलसा जुयाः माःपिन्त माः कथं सूचं बिया च्वना दीम्ह संचार संवाहक खः झी नातिदाइ ! चिकुलां अति हे ख्वाउँक फय् वः थाय् मुलेपतिं थ्यानाः गां छपुतिं पुलिं त्व पुयाः व छबालाचागु लबचाय् च्वनाः झीगु भाषा ख्यःया सेवा याना झाःम्ह छम्ह महारथी खः झी नातिदाइ !
सदां न्ह्यू ख्वाः, सुयातं भेदभाव मयासें सकसितं माः कथं माःगु सूचंया संवाह कखः वय्कः । आः थें जाःगु बिद्युतीय माध्यम धइगु मदु बलय् सामाजिक संजालया सूत्रधार कथं झीसं वय्कःयात काय्माः । वय्कलं यानादीगु ज्या धइगु गुगुं नं लोडसेडिङ्गं पने मफइगु ज्या खः । सकलसिया सेवा यायां पुलि स्याइगु ल्वय् बियापिं नं झी हे खःला धइथें ताइगु जितः । छाय् धाःसा भाषा यानिः स्वार्थ रूपं सेवायाना झाःम्ह जिं मेपिं नाप संगत याय् मनं । श्रष्टातसें बी हःगु कृतित, पत्रपत्रिका आदि जक व बःचाधंगु सफू पसलं गुलि हे ख्येँ थ्वइगु खः, सकसिनं स्यूगु हे यच्चुगु यथार्थ खः ।
अथेसां छेँजःया मतिना, ग्वाहालिं वय्कःया भुतू च्याना च्वंगु झीसं स्यू । वय्कःया भाषिक मतिनाया प्याय्चाःयात छेँजःपिन्सं सदां अब्बल दर्जाय् तयाः नेपालभाषा साहित्य ख्यःया सेवाय् वय्कःयात गबलें पंगः थनेगु कुतः मयाःगु यात प्रमिला तता, नःलि, लूजः व भिंचा भाजुपिं सकलसितं आपालं आपाः सुभाय् देछानाच्वना ।
भोताहिति लँ जुयाः वं क्वरां सफूधुकुतिइ मिखा वंपि नेवाःत जक मखु, मेगु भाषायापिन्सं तकं म्हस्यूगु पसःया साहित्यिक देगःया द्योपाः लाः खः झी नातिदाइ !
वय्कःयात आइसियूलय् भर्ना याः खुन्हु हे जि भोताहिति जुयाः छेँ लिहाँ वया बलय् वय्कःया भिंचा भाजुं चाय्का च्वना दीगु पसः मचाः बलय् जिगु नुगलय् चिंक मिंगु खः । अन पसलय् छम्ह खँय्नी नं वसः पसः तया च्वन ।
बहनी जू बलय् मेट्रो एफएमं बुखँ न्यं कल । जिगु दकलय् लिपांगु चिनाखँ मुना “प्रेशरकूकरया चिल्लाय्” सफू नातिदाइया सफू धुकुतिइ तय् यंका बलय् भिंचा भाजुं थौंकन्हय् नेवाः भाय्या सफू हे न्याःवःमदु तता धयादिल । जिं “छुं खँ मदु बाबु ! थन नातिदाइ पसलय् मदुसां सफू धुकू दु धकाः स्वः जकसां वइ ।” धकाः त्वः तावया ।
हिं मदुसां हिं थलय् सुवास लादया हे च्वनी थें झी नातिदाइ व वय्कःया सफूधुकू नेपालभाषायात मतिना याइ पिनिगु नुगलं गबलें हुया छ्वय् मफइगु बिश्वास खः ।
“अनिच्चावत संखारा”
