सिन्धुलीगढीइ नेपाली सेनां शुरु यागु युद्ध सङ्ग्रहालय निर्माण सम्पन्न जूगु दु। युद्ध सङ्ग्रहालय थौें बुधबाः राष्ट्रपति विद्यादेवी भण्डारीपाखे उलेज्या याइगु ज्याझ्वः दु।

नेपाली सेनां करीब ७ करोड लगानीइ दयकूगु उगु युद्ध सङ्ग्रहालय भवन व सजावटया ज्या क्वचागु दु। सिन्धुलीगढी युद्ध सङ्ग्रहालय भवनया निर्माण ज्या न्यू ड्रागन÷सिद्धगढी जेभी कोटेश्वरं यागु खः। भवनया डिजाइन आर्किटेक्निक डेभलपमेन्टं यागु खः।

अथहे दुनेया सजावट अल्टरनेट इन्फ्रास्ट्रक्चर प्रालि धुलिखेलं यागु खः। सङ्ग्रहालयय् युद्धकालीन अवस्थाया पात्र, सिन्धुलीगढी युद्धया घटनाक्रम, सैनिकया मिखाय् युद्धया परिदृश्य, सिन्धुलीगढी युद्धया वृत्तचित्र, चरणबद्ध युद्धया चित्र, तत्कालीन युद्धय् प्रयोग यानातःगु घरेलु हतियार, युद्धकालीन हातहतियार, अङ्ग्रेजपिन्स प्रयोग यागु तोप, नेपाली योद्धा, बेलायती योद्धा, नेपाली योद्धाया कलाचित्र, मिथिला कला, बेलायतीपिनिगु नामय् दयका तःगु स्तम्भ, युद्धकालीन शिलालेख, ऐतिहासिक दस्तावेज व इतिहासया पुस्तकालय तयातःगु खः।

सिन्धुलीगढी युद्ध सङ्ग्रहालय विसं २०७३ कात्तिक २४ गते पूर्वउपप्रधानमन्त्री व रक्षामन्त्री ईश्वर पोखरेलं शिलान्यास यागु खः।

Categorized in राष्ट्रिय