सिरिञ्ज आतंकयात कयाः गम्भीर जुइमाः
जुजुमान महर्जन
 
थौंकन्हय् स्वनिगलय् जक मखु, स्वनिगःपिने नं उतिकं हे आतंक न्यना च्वंगु खः, सिरिञ्ज आतंक । थुगु आतंकं यानाः थौंकन्हय् हुल मुलय् जुइत वा सु नं मनू लिक्क वल धाःसा आतंकित जुइगु अवस्था ब्वलंगु दु ।
 
थ्व आतंकपाखें सर्वसाधारण मनूत थुलि आतंकित जुयाच्वंगु दु कि आः गन नं वने माःसा थुकिया उपचार छु खः धइगु तकं धाय् फूगु अवस्था मदु । थुकियात कयाः प्रहरी प्रशासनं नं ज्यंके मफया च्वंगु अवस्था अथवा आतंक न्यंकीपिं मनूतय्त म्हसीके मफया च्वंगु व आतंक झन् झन् न्यना वना च्वंगुलिं नं मनूतय्के मनोबैज्ञानिक त्रास अझ अप्वया वनाच्वंगु दु ।
 
 
सिरिञ्ज आतंक न्हापां येँया डल्लुइ जूगु धइगु बुखँ वःगु इलय् तक मनूतय्सं थुकियात गम्भीर कथं मकाःगु खः । थुकियात कयाः विशेष यानाः ब्वला सालेगु भावनां जक जुयाच्वंगु खः धइगु अनुमान याना वयाच्वंगु खः । जब प्रहरी प्रशासनं येँया महाराजगञ्जय् च्वंगु छगू रेष्टुरेण्टया सञ्चालक सन्तोष कार्कीयात थुगु आतकंकया दोषी कथं ज्वनाः सार्वजनिक यात, उबलेनिसें मनूतय्गु बिचाःयात हिलाबिल । वय्कःया कथं थःत आनन्दया नितिं थजाःगु ज्या यानागु धकाः अभिब्यक्ति बीवं गुलिस्यां थुकियात कयाः तसकं अमानवीय ज्या धका ःआपत्ति प्वंकूगु दुसा गुलिस्यां थुगु अभिव्यक्तियात सहज रुपं पचय् याय् फयाच्वंगु मदु ।
 
 
सिरिञ्ज आतकंपाखें विशेष यानाः मनूत दीर्घकालीन व तसकं ग्यानापूगु ल्वय् एचआइभी एड्स व हेपाटाइटिस बी न्यंकेगु तातुनां यानाच्वंगु आशंका ग्याना च्वंगु खः । खय्तला थजाःगु तातुनां मजूसां थजाःगु घटनापाखें थीथी कथंया आतंक ब्वलनीगु स्वभाविक हे खः । गुगु थौंकन्हय् जुयाच्वंगु दु ।
 
 
थुगु घटना थौंकन्हय् डल्लुं न्यनावनाः येँया किपू, काभ्रेया भ्वँतय् तक नं थ्यना च्वंगु दु । थौंकन्हय् थजाःगु आतकंपाखें पीडित मनूत न्हियां न्हिथं अप्वया वनाच्वंगु व अस्पतालय् वयाः थजाःगु घटनायात कयाः हेपाटाइटिस बी व एआरभीकायुत वइपिं अप्वया वनाच्वंगु नं अस्पताल श्रोतपाखें न्ह्यथनाच्वंगु नं दु ।
 
 
सिरिञ्ज आतंकयात कयाः मनोबैज्ञानिकपिन्सं मनूतय्के दइगु छगू मनोबैज्ञानिक समस्या वा थजाःगु ल्वय्या हुनिं थजाःगु व्यवहार क्यनाच्वंगु दइ धकाः नं विश्लेषण यानाच्वंगु दु । मेपिन्त दुःख बियाः आनन्द काय्गु छगू मनोबैज्ञानिक ल्वय्या हुनिं पीडकपिन्सं थजाःगु ज्या यानाच्वंगु दु धाःसां नं थजाःपिं मनूतय्त गजाःगु सजाँय बीगु खःधइगु खँय् धाःसा सचेत जुइ माःगु अवस्था दु ।
 
 
छाय् धाःसा मनू तय्के आतंक न्यंकेगु धइगु मनोबैज्ञानिक समस्या हय्गु व थ्व गुलि तक घातक जुइ धइगु खँय् स्वयम् स्वास्थ्यलिसे सम्बन्धित विज्ञपिं व मनोविज्ञानलिसे सम्बन्धित मनोविज्ञतसें स्यूगु खँ खः ।
 
 
मनू तय्त स्वतन्त्र पूर्वक म्वाय् दइगु अधिकारयात तकं हनन् जुइ कथं न्यंकीपिं थजाःपिं मनूतय्त नियन्त्रण कयाः कडा स्वयां कडा सजाँय बीगु नितिं प्रहरी प्रशासन नं उलि हे चनाखो जुइ माःगु खने दुसा आतंकित याःम्ह सन्तोष कार्कीया बयानयात नं उलि सहज कथं कयाः त्वःतेफइगु अवस्था मदु । आःया अवस्थाय् स्वय्गु खःसा थ्व छगू गिरोह हे दुगु खःला ?
 
 
गुगु गिरोहपाखें मनू तय्त आतंकित याय्गु ज्या यानाच्वंगु दु । उकिं थजाःगु खँय् सम्बन्धित निकाय गम्भीर जुयाः मां कथंया कारवाही न्ह्याके माःगु आःया आवश्यकता खः ।