सीमाय् सुरक्षा पोष्ट र सुरक्षाकःमि अप्वयेकेगु गृहमन्त्रीया धापू
गृहमन्त्री रामबहादुर थापां भारत व चीनया सीमाय् सुरक्षा पोष्ट र सुरक्षाकःमि अप्वयेकेगु धयादीगु दु ।
 
थौं सोमवाः राज्य व्यवस्था लिसें सुशासन समितिइ सांसदपिन्सं तयादीगु जनच्यूताःया विषयया लिसः बियादिसें गृहमन्त्रीं थापां थौंकन्हय् निगुलिं देसया सीमानाय् सुरक्षाकःमि व पोष्ट म्हो जूगु धयादिल ।
 
मन्त्री थापां थुगु विषयस न्हापांनिसें हे सहलह जूसां नं कालापानीया विषय वयेधुंकाः दबाब अझ अप्वःगु नं धयादिल । वय्कलं धयादिल, ‘झीगु सीमा व नाकाय् सुरक्षाकःमि म्हो जक दु । पोष्ट नं म्हो दु । आः याकनं हे निगुलिं तनेगु जुइ ।’
 
समितिया दुजःपिन्सं सीमा सुरक्षा पोष्ट नं सीमाना स्वयां तसकं हे तापाक्क दुगु नं धाःगु खः । थुकिया लिसः बियादिसें गृहमन्त्री थापां धयादिल, ‘आः पोष्टत हे २०÷३०गू किलोमिटर थुखे हे दु । आः सीमानाया लिक्क यंकेमाः ।’
 
थौं सोमवाः च्वंगु समितिया मुँज्याय् कालापानीया विषयस सांसदपिन्सं खँ ल्ह्वंगु खःसा थुकी सरकारं तत्काल पलाः न्ह्याकेत नं इनाप याःगु खः ।
 
समितिया सभापति शशी श्रेष्ठं फुक्क सांसदपिंलिसे सहलह यानाः सरकारयात तत्काल राजनीतिक व कूटनीतिककथं वार्ता यायेत उजं बियादिल । वय्कलं सीमा स्तम्भयात तकं व्यवस्थित यायेत सरकारयात उजं बियादीगु खः ।
 
सभापति श्रेष्ठं उजं बियादिसें धयादिल, ‘काली खुसि पूर्व नेपाल व पश्चिम भारत धयातःगु दु । अथे मखु । काली खुसि हे सीमान खः । निगुलिं देसया बच्छि बच्छि काली खुसि खः । थुकियात स्थापित यायेमाः ।’