विश्व बैंकं सुडानयात आर्थिक ग्वहालि दिकेगु घोषणा याःगु दु ।

सुडानय् सेनां कू यानाः सत्ता ल्हातय् कायेधुंकाः जुयाच्वंगु प्रदर्शनया झ्वलय् याःगु दमनयात कयाः अन्तर्राष्ट्रिय स्तरय् व्यापक आलोचना जुयाच्वंगु इलय् विश्व बैंकं सुडानयात बियावःगु ग्वहालि दिकेगु धाःगु खः ।

सेनां असंवैधानिक तरिकां सत्ता कब्जा याःगु धासें अफ्रिकन युनियनं नं सुडानयात थःगु पुचलं निलम्बन याःगु दु । धमाधम आर्थिक अनुदान ग्वहालि म्ह्वः जुयावंबलय् नाजुक अर्थतन्त्र जूगु सुडानं गम्भीर लिच्वः फयेमालीगु आर्थिक विशेषज्ञतय्सं चेतावनी ब्यूगु दु ।

थ्व हे दथुइ, विश्व बैंक व एयुया हे पलाःया हुनिं सैनिक विद्रोहया नाइके जनरल अब्देल फत्ताह बुर्हानयात नागरिक सरकारया पुनस्र्थापनाया लागिं दबाब लाःगु धाःगु दु ।

विश्व बैंकया नायः डेभिड माल्पासं सुडानया लिपांगु घटनां तसकं चिन्तित जुयागु धासें अनया सामाजिक, आर्थिक उत्थान अले विकासया ज्याय् नाटकीय लिच्वः लाइगु धयादीगु दु ।

Categorized in अन्तर्राष्ट्रिय