अफ्रिकी देय् सुडानय् सैनिक कू लिपा तच्वगु आन्दोलनय् ७ म्ह सीगु दुसा सच्छि व ४०म्ह घाःपाः जूगु दु ।

सेनां देय्या प्रधानमन्त्री व अन्तरिम सरकारया मन्त्रीतयेलिसें आपालं दुजःतयेत गिरफ्तार याना सत्ता लाकाकायेधुंका राजाधानी खार्तुमय् द्वलंद्वःम्ह ब्वज्यामि सतकय् कुहाँवःगु खः ।

ब्वज्याय् दुथ्यापिन्सं सतकय् टायर च्याका विरोध याःगु लिसें भौतिक सम्पत्तिइ मिं च्याकेधुंका सेनां गोलीं कयेका न्ह्योनेलाथें लाठी चार्ज याःबयल् स्थिति नाजुक जूगु खः । सुडानया सेनां अमेरिकाया विशेष प्रतिनिधिया उपस्थितिइ सत्तारुढ परिषदलिसे सम्झौता यायेधुंका सत्ता कजयेस काःगु खः ।

सेनां देय्या सरकारी टिभी व रेडियो  मुख्यालययात थःगु नियन्त्रणय् काःगु दु । सत्ता नियन्त्रणय् कायेधुंका प्रधानमन्त्री लिसेंया सरकारया जिम्मेवार पदय् दूपिन्त ज्वनेधुंका द्वलंद्वल्म्ह ब्वज्यामित सतकये कुहाँवःगु खः ।

उमिसं नागरिक शासन लिहाँमवतले आन्दोलन न्ह्याकेगु न्ह्यथंगु दु । सुडानय् ३०दँ निसें राज यानाच्वंम्ह ओमर अल बशीरयात सत्तां चिइकेधुंका निदँ न्ह्यः अन्तरिम सरकार अस्तित्वय् वःगु खः ।

उगु इलंनिसं सेना व नागरिक सरकार दथुइ टकरावया स्थिति जुयाच्वंगु दु ।

Categorized in अन्तर्राष्ट्रिय