२०७७ माघ ८, बिहिबार

सुस्त जुयाच्वंगु सम्पदा पुनःनिर्माण

जुजुमान महजंन
 
 
२०७२सालया तःभुखाचं नेपाःया यक्वः हे सांस्कृतिक महत्वं जाःगु सम्पदायात बामलाक्क लिच्वः लाकूगु खः । थुकिं यानाः नेपाःया पर्यटनय् हे बांमलाक्क लिच्वः लाइगु खःला धकाः सम्बन्धित ख्यलं च्यूताः प्वंकेगु ज्या जूगु खः । थ्व च्यूताः विशेष यानाः सम्बन्धित ख्यःया विद्वानपिन्सं जक मखु, सर्वसाधारणपिन्सं नं उलि हे काःगु खःसा अझ प्रतिनिधिसभा व प्रदेश सभाया चुनावया इलय् पार्टीया नेतातय्सं थुकियात मुद्दा हे दय्काः न्ह्याःवःगु खः।
 
 
छचाखेरं कयाच्वंगु च्यूताःया बाबजूद नं आःतक नं सांस्कृतिक महत्वं जाःगु सम्पदात पुनःनिर्माणया ज्याय् धाःसा तिब्रता वःगु खनेमदु। अझ थुकियात कयाः विवाद अझ ब्वलनाच्वंगु खनेदु, अर्थात ज्या स्वयां नं थुकियात कयाः विवाद हे अप्वया वनाच्वंगु खनेदु । थुकिया ज्वलन्त उदाहरण येँया लानीपुखूयात काय्फु। थुगु पुखूया पुनःनिर्माण याय्गु निति सम्पदायात हे लिच्वः लाइकथं कंक्रिट नं दय्केगु ज्या जुल । थुकियात कयाः स्थानीयबासीलिसें सम्पदाप्रेमिपिन्सं विरोध यात । थुकिया लिच्वःकथं लानीपुखू गथे यानाः दय्केगु धइगु खँय् विज्ञपिनिगु पुचः नीस्वनाः सुझाव काय्गु ज्या जूगु खः।
 
तर सुझाव काःगु ताःई लिपा नं थुकिया ज्या न्ह्याःगु खनेमदु । राष्ट्रपतिं तक हे पुनःनिर्माणया नितिं शिलान्यास यानाः न्ह्याकूगु ज्यायात कयाः आःतक नं मूर्त रुप बीमफूगु धइगु छगू ला राष्ट्रपतिया हे अपमान खःसा मेखे थुगु सम्पदायात कयाः महानगरपालिका, पुरातत्व विभाग गुलितक सम्वेदनशील जुयाच्वंगु दु धइगु नं स्पष्ट जुजुं वनाच्वंगु दु
 
सम्पदायात कयाः सम्बन्धित निकायपाखें क्यनाच्वंगु छगू उदासिनताया उदाहरण येँया सांस्कृतिक सम्पदाया ल्याखं अतिकं महत्वपूर्ण मरुसतः नं खः । मरुसतःयात कयाः थीथी निकायपाखें दय्केगु खँ वयाच्वंसां नं अन्ततः काष्ठमण्डप पुनःनिर्माण समिति गठन यानाः पुनःनिर्माणया ज्या याय्गु धकाः घोषणा लिसें पूजापाठ याय्गु ज्या जूगु खः । थुकिया नितिं महानगरपालिकापाखें  प्रारम्भिक चरणकथं न्यय्गू लखतका अनुदान नं बीगु ज्या जूगु दु।
 
तर थुकिया कयाः गुगु ज्या न्ह्याकेमाःगु खः, व धाःसा आःतक छुं हे छाँटकाँट खनेमदु । महानगरपालिकापाखें निदँया दुने क्वचाय्केमाः धकाः निर्देशन ब्यूसां नं पुनःनिर्माण समितिपाखें स्वदँनिसें प्यदँतक ई काइ धकाः धाःगु थुगु पुनःनिर्माण थजाःगु गतिं स्वय्गु खःसा थुकियात मूर्त रुप बीगु ज्या यक्व हे लिबाइगु खनेदु।
 
थ्व जक मखु, हनुमाध्वाखा दरबार स्क्वायरय् स्वय्गु खःसा महत्वंजाःगु आपालं सम्पदात गुलिं ध्वस्त जूगु दुसा गुलिं तू नकाः तयातःगु खनेदु । थुकियात स्वय्बलय् झीगु खँ व ज्याय् “मेल” मजूगु अप्वस्यां महसूस यानाहःगु दु । थुकिं सम्पदाया जक मखु, आदिवासी नेवाःतय्गु हे म्हसीका न्हनावनीगु खःसा मेख नेपाःया मू आयश्रोतकथं जुयाच्वंगु पर्यटन उद्योगय् नं दूरगामी लिच्वः लाइगु जकं मखुला धकाः च्यूताः प्वंकाहःगु खनेदु।