स्टे होमया अवस्थाय् हे सरिश्माया न्हूगु म्यूजिक भिडियो पिहांवल
अमेरिकाय् च्वनावःम्ह नांजाःम्ह म्येहालामि सरिश्मा अमात्यं स्टे होमया अवस्थाय् हे थःगु म्येया न्हूगु म्यूजिक भिडियो ‘ढुकढुक गर्ने दिलैमा’ सार्वजनिक यानादीगु दु । 
 
थौंकन्हय् अमेरिकाया मेरिल्यान्ड राज्यया बाल्टिमोरय् च्वनावःम्ह म्येहालामि अमात्यं थःगु छेँ दुनं हे भिडियो दयेकाः सार्वजनिक याःगु खः ।
 
हलिंन्यंक कोभिड १९या संक्रमण न्यनाच्वंगु अवस्थाय् अमेरिकाय् नं स्टे होम आदेश जारी जूगु दु । अमेरिकाय् लकडाउन मधाःसे स्टे होम धाःसा थ्व लकडाउन थुज्वःगु हे अवस्था खः ।
 
संक्रमण न्यंकेमबीत सकलें छेँय् हे च्वनाः भौतिक दुरी कायम याये धइगु हसना बीत थुगु म्यूजिक भिडियो दयेकागु म्येहालामि अमात्यं धयादिल ।
 
‘आःया अवस्थाय् समाजयात सुरक्षित व संक्रमणमुक्त दयेकेत छेँय् हे च्वने व छुं न छुं श्रृजनात्मक ज्या याये धइगु हसना बीत थुगु म्यूजिक भिडियो दयेकागु खः’ अमात्यं धयादिल ।
 
छेँय् दुने च्वनाः थम्हं सःगु श्रृजनात्मक ज्या यानाः समाजयात नं मनोरन्जन बीत अमात्यं सकसितं इनाप नं यानादिल ।
 
म्येया छायाङ्कन म्येहालामि अमात्यया हे छेँय् दुने यानातःगु दु । म्येया छायाङ्कनया लिसें पोस्ट प्रोडक्सनया दक्वं हे ज्या वयकःया छेँ दुनं हे याःगु खः ।
 
छायाङ्कनया लागिं समाः ला अमात्य थम्हं हे यानादिल । म्येया निर्देशनया नापं, क्यामेरा व भिडियो एडिटिङया ज्या म्येहालामि संजीप प्रधानं याःगु दु । म्येहालामि प्रधान सरिश्माया जहान खः ।
 
म्यूजिक भिडियोया निर्देशन, क्यामेरा, एडिटिङया ज्या यानाबलयया अनुभवया खँय् म्येहालामि प्रधानं धयादिल, ‘म्ये हाले हे अःपु खनी, थम्हं यानावयागु ज्या स्वयां पाःगु ख्यलय् ज्या यायेबलय् भचा थाकु हे खनी, तर न्ह्यइपुसे नं च्वन ।’
 
करीब १५दँ न्ह्यः हे रिलिज जूगु सरिश्माया एल्बम मधुरीमा २या थुगु म्येय् संगीत नांजाःम्ह संगीकार अनिल शाहीया दुसा जनक दिप पराजुलीं म्ये च्वयादीगु खः ।
 
 
Categorized in मनोरन्जन