स्थानीय चुनावया घोषणालिसें वःगु हाथ्या
- जुजुमान महर्जन
चुनावया तिथि घोषणा न्हापा यायेगु कि संविधान संशोधन विधेयकयात कयाः सहलह लिसें पारित यायेगु धइगु खँय् पार्टीत दथुइ जुयाच्वंगु दोहोरी कासाय् चुनावया तिथि घोषणा हे न्हाप लाःगु दु ।
न्हूगु संविधानकथं वइगु माघ ८ गते दुने स्वंगुलिं तहया चुनाव क्वचायेकेमाःगु बाध्यताया दथुइ दलत दथुइ जुयाच्वंगु विवादय् छुं हदतक चुनाव तिथि घोषणा यायेगु ज्या न्ह्यःने लाःगु दु ।
थुगु घोषणां स्थानीय तगिमय् जनप्रतिनिधि दयाः विकासया ज्या न्ह्यःने वनीगु व कर्मचारीतन्त्र क्वचाइगु ल्याखं जनतात उत्साहित जुयाच्वंगु दुसा मेखे थुगु चुनावया कार्यान्वयनयात कयाः थीथी कथंया हाथ्यात नं उलि हे ब्वलनाच्वंगु दु । गुगु हाथ्याया सामना सरकारं यायेफइगु खः वा मखु धइगु न्ह्यसः नं ब्वलनाच्वंगु दु ।
स्थानीय चुनावया सरकारया घोषणायात कयाः विशेष यानाः मूमू पार्टी नेपाली कांग्रेस, माओवादी लिसें संविधान संशोधन स्वयां न्हापां चुनाव यायेमाः धकाः अडान कया वयाच्वंगु प्रतिपक्षी दल नेकपा एमालें लसकुस याःगु दुसा संविधान संशोधन यानाः जक चुनावया तिथि घोषणा यायेमाः धकाः आन्दोलन याना वयाच्वंगु असन्तुष्ट दलपाखें चुनावया तिथिया घोषणाया नापनापं आन्दोलनया उद्घोष याःगु दु । थुकिं यानाः निगू पक्ष दथुइ द्वन्द्व तकं ब्वलंगु दु । उकिया दसुकथं तराइ लागाय् नेकपा एमालेया नेता माधवकुमार नेपालं याःगु सभाय् ल्वापु जूगु घटनायात कायेफु ।
संविधान संशोधन विधेयक सरकारं हे संसदय् न्ह्यब्वःगु खः । उकियात कयाः विशेष यानाः प्रतिपक्षी दल नेकपा एमालें सहलह तकं याके मब्यूसें लगातार संसदय् पंगः थनाच्वंगु खः । गुकियात कयाः अप्रजातान्त्रिक ज्या धकाः टिप्पणी नं छचाखेरं जूगु खः । थःगु बिचाः न्ह्यब्वयेगु वा संसदय् तयेगु धइगु मेगु हे खँ खः, तर उगु इलय् एमालें सहलह तकं याके मब्यूगु धइगु प्रजातान्त्रिक परिपाटीइ थःगु अप्रजातान्त्रिक हठ प्रदर्शन याःगु खः ।
तर आः वयाः थःगु खँ न्ह्यःने लायेवं संविधान संशोधनयात कयाः सहलह याकेबीगु खँ न्ह्यःने हयाच्वंगु दु । अझ थुगु विधेयक पारित जुइगु अवस्था ब्वलंसा अझ नं संसदय् पंगः मथनी धकाः धायेफूगु अवस्था मदुनि । छाय्धाःसा देश स्वयां नं थःगु पार्टी तःधं धइगु ल्याखं न्ह्यःने वनाच्वंगु दु, उकिं देशयात निकास बीगु स्वयां नं पार्टीया अडानयात न्ह्यःने तयाच्वंगु दु, गुकिंयानाः सहलह यायेगु वातावरण तकं दयेके मफयाच्वंगु अवस्था खः ।
थुकिया पाय्छि अःखः मधेसवादीलिसें जनजाति, आदिवासीपिं संविधान संशोधन विधेयक पारित मजुइकं थःपिनिगु अधिकार सुरक्षित मजुइगु अवस्थायात ध्यानय् तयाः आन्दोलनया घोषणा याःगु दु । उमिसं चुनावयात वहिष्कार यायेगु तकं धायेधुंकूगु दुसा थुकी पुलांम्ह प्रधानमन्त्री डा. बाबुराम भट्टराईया नयाँ शक्ति पार्टी नेपालं तकं व्यवस्थापिक संसदय् दर्ता जूगु संविधान संशोधन प्रस्ताव पारित जुइधुंकाः जक जुइमाःगु खँ न्ह्यथनाच्वंगु दुसा स्वायत्त क्षेत्र, संरक्षित क्षेत्र व विशेष क्षेत्रया संख्या व सीमा निर्धारण यानाः ल्यंदुगु भूगोलयात जनसंख्याया आधारय् स्थानीय तह दयेकेमाः धकाः माग यानाच्वंगु दु ।
थुकिया ल्याखं स्वयेगु खःसा थौंकन्हय् गुकथं सीमा निर्धारण यानातःगु दु, व स्थानीय चुनाव जुइत्यंगु दु, उकियात नितिं छगू हाथ्या खः धायेफु । फुक्क दलया सहमतिइ चुनाव यायेमाः धकाः धाःसां नं मूमू दलया स्वार्थय् जुइत्यंगु थुगु चुनाव आः गुखेपाखे वनी धइगु अन्यौलता ब्वलनाच्वंगु दु । थजाःगु अवस्थाय् चुनावया घोषणां देशयात निकास बीगु स्वयां नं झन् द्वन्द्वपाखे जक उन्मुख जुइगु जक मखुला ? धकाः न्ह्यसः तया हयाच्वंगु दु ।
