स्थानीय तहया जनप्रतिनिधि दथुइ ल्वापु मदु : प्रमुख शाक्य
नृपेन्द्रलाल श्रेष्ठ | गुंलागा पारु ११३९ (अगष्ट १६ २०१९)
येँं महानगरया प्रमुख बिद्यासुन्दर शाक्यं स्वनिगःया स्थानीय तहया जनप्रतिनिधि दथुइ राजनीतिक ल्वापु मदु धकाः धयादिसे कार्यकर्ताया दथुइ न अथे ल्वापु मयायेत इनाप यानादिगु दु ।
नगर—नगर दथुइ साझेदारि ज्याझ्वः अन्तर्गत चन्द्रगिरी नगरपालिका वडा १३ य् कंकाली द्यःया थाय् मदन भण्डारी पार्क शिलान्यास यायेगु झ्वलय् थःथे धयादिगु खः । चुनावया इलय् फरक राजनीतिक दलया ध्वाँय् ज्वना वःसा आः झी दक्को जनताया साझा खः धका न धयादिगु खः ।
वयकलं चन्द्रागिरी नगरया प्रमुखया क्यना चुनाबया इलय् वयकः व जिगु दल फरक खः, आः जिपि निम्ह बांलापि पासा खः, नगरया साझा व एकीकृत बिकास यायेगु लागि जिपिं दथुइ बिबाद मदु धका धयादिगु खः ।
उगु शिलान्यास ज्याझ्वलय् थःगु खँ तयेग झ्वलय् चन्द्रागिरी नगरया प्रमुख घनश्याम गिरीं पार्क करीब ५ करोड ध्यवाया लागतय् निर्माण जुइ त्यःगु खँ तयादिसे थुगु ज्याझ्वःया लागि येँ महानगरं उपलब्ध याउगु १ करोड व चन्द्रागिरीं बिनियोजन याउगु १ करोड मिले याना २ करोडयाँ लगानीं पार्क निर्माण न्ह्याकगु धकाः जानकारी बियादिगु खः ।
नेपाल भ्रमण बर्ष २०२० या लागि तय याउगु १०० गु गन्तव्यया सूचीइ चन्द्रागिरी नगरयात न छनौट याउगुलि नेपाल सरकारयात सुभाय् बियादिसे मेयर गिरीं इन्द्र दह पर्यटकीय पूर्वाधार बिकास क्षेत्रया रुपय् सूचीकृत जुगु जानकारी न बियादिगु खः ।
उगु ज्याझ्वलय् येँ मनपाया उपमेयर हरिप्रभा खड्गी श्रेष्ठ, संघीय संसद सदस्य कृष्ण गोपाल श्रेष्ठ, वडा १३ या अध्यक्ष बालमुकुन्द बिडारी, दलीय प्रतिनिधि राजु श्रेष्ठ, कानुनी सल्लाहकार सञ्जिव आचार्यपिन्स न थःथःगु नुँगः खँ तयादिगु खः ।
