स्थानीय तह पुनःसंरचना सम्बन्धी सप्तरीइ जूगु सहलहस मधेसवादी दलं पंगः थनेवं पुनःसंरचना सम्बन्धी ज्या अनिश्चित जूगु दु ।

स्थानीय तह पुनःसंरचना सम्बन्धी प्रतिवेदन लःल्हायेगु अन्तिम दिं थौं सञ्चवाः जिल्ला विकास समिति सप्तरीया सभाकक्षय् ग्वसाः ग्वःगु सहलह ज्याझ्वलय् मधेसवादी दलया कार्यकर्तातयसं नाराबाजी यासे माइन्यूट खुनाबीवं जिल्लाय् पुनःसंरचना सम्बन्धी ज्या अनिश्चित जूवंगु खः ।

स्थानीय तह पुनःसंरचना संबन्धी प्राविधिक समितिया सदस्य सचिव नापं जिल्ला विकास समिति सप्तरीया योजना अनुगमन नापं प्रशासकीय अधिकृत धीरेन्द्रकुमार यादवं मधेसवादी दलं पंगः थंगु हुनिं ज्याझ्वः स्थगित यायेमाःगु खँ धयादिल । जिल्लाय् क्रियाशील फुक्क राजनैतिक दलया प्रतिनिधितयत सःताः थौं न्हिनय् जिविस सभाकक्षय् पुनःसंरचनायात कयाः सहलह न्ह्यायेवं मधेसवादी दलया नेतातयसं सीमांकनया खँ क्वःमज्यूतले ज्या याके मबीगु धासें निर्णय पुस्तिका खुनाब्यूगु खः ।

थ्वयां न्ह्यः नं सप्तरीइ स्थानीय तह पुनःसंरचना सम्बन्धी सहलहस मधेसवादी दलया कार्यकर्तातयसं पंगः थनाब्यूगु खः । ज्याझ्वलय् पंगः थनेधुंकाः मधेसवादी दलया कार्यकर्तातयसं जिल्ला विकास समितिया परिसरलिसें राजविराज नगर क्षेत्रय् नाराबाजी यासें स्थानीय निकाय पुनःसंरचना सम्बन्धी ज्यायात कयाः विरोध प्वंकेगु ज्या जूगु खः ।

प्राविधिक समितिया सदस्य सचिव यादवया कथं मधेसवादी दलया पंग थनेगु ज्यापाखें तःक्वः हे सहलह याःसां नं ज्या यायेमफूगुलिं वहेकथंया प्रतिवेदन केन्द्रय् छ्वइगु जूगु दु ।

Categorized in राजनीति