स्थानीय निर्वाचनया उम्मेदवारी दर्ता जुल
बछलाथ्व सप्तमी ११३७ (मे २ २०१७) लहनान्यूज | बछलाथ्व सप्तमी ११३७ (मे २ २०१७) लहनान्यूज
बैसाख ३१ गतेया नितिं क्वःछिनातःगु स्थानीय तहया निर्वाचनया नितिं उम्मेदवारी दर्ताया ज्या न्ह्यानाच्वंगु दु ।
व हे झ्वलय् येँ मेयर पदया नितिं १३ आकांक्षा खनेदुगु दुसा उपमेयरय् ९म्हेसिनं उम्मेदवारी दर्ता याकूगु दु ।
स्थानीय तहया चुनावया नितिं एमाले व राप्रपां येँ महानगरपालिका व यल महानगरपालिकाय् तालमेल याःगु दु । व कथं एमालें निगुलिं महानगरपालिकाय् मेयर पद काइ सा निगुलिं नगरपालिकाया उपमेयर राप्रपायात ब्यूगु दु ।
एमालें येँ महानगरपालिकाया मेयरय् विद्यासुन्दर शाक्ययात थंगु दुसा यलय् हरिकृष्ण व्यन्जनकारयात थंगु दु । राप्रपापाखें येँ महानगरपालिकाया उपमेयरय् राजाराम श्रेष्ठयात न्ह्यःने हःगु दुसा यलय् सुकमाया तामाङयात थनेहःगु दु ।
अथे हे संघीय समाजवादि फोरम नेपाल व नयाँ शक्ति दथुइ नं तालमेल यानाः उम्मेदवारी ब्यूगु दु । येँ महानगरपालिकाय् मेयरय् संघीय समाजवादिया पवित्र बज्राचार्यं उम्मेदवारी ब्यूगु दुसा उप मेयरय् नयाँ शक्तिया सविना अर्याल दंगु दु ।
कांग्रेसपाखें येँ महानगरपालिकाया मेयरय् राजुराज जोशीं दावी यानादीगु दुसा उपमेयरय् हरिप्रभा खड्गी न्ह्यःने वःगु दु ।
थौं सुथय् १०ताः इलंनिसें न्ह्याःगु उम्मेदवारी दर्ता आः सनिलया ५ताः ईतक्क जुइ । उम्मेदवारया नां धलः नं थौं हे सार्वजनिक याइगु धाःगु दु ।
Categorized in राजनीति