स्पानिस सुपर कपय् भ्यालेन्सियायात बुका रियल फाइनलय्
लहनान्युज | पोहेलाथ्व चतुर्दशी ११४० (जनवरी ९ २०२०)
रियल मड्रिड थुगु सिजन निसे न्हुगु ढाचा कथं स्पानिस सुपरया फाइनलय् थ्यःगु दु । वःगु चान्ह्य साउदी अरेबियाय् जुगु न्हापागु सेमिफाइनल कासाय् भ्यालेन्सियायात ३—१ गोलं रियल फाइनलय् थ्यःगु दु ।
थ्वस्वया न्ह्यः स्पानिस ला लिगा व कोपा डेल रेय् त्याकुम्ह तपिकं सुपर कपया फाइनल म्हितिगु खःसा थुगु पटक वःगु सिजन ला लिगाया शीर्ष थासय् निगु टिम व कोपा डेल रेय् फाइनल थ्यःगु निगु टिमया दुथ्याका सुपर कप म्हितिकुगु खः ।
बार्सिलोनां वःगु सिजन ला लिगायो उपाधि त्याकुगु खःसा कोपा डेल रे फाइनल म्हितुगु खः । रियल मड्रिड लिगय् स्वगुगु थासय् लागु खः । तर बार्सिलोना कोपा डेल रेया फाइनल थ्यःगु खःसा ला लिगाय् न स्वगुगु थासय् रियलं थुगु सिजन सुपर कप म्हितिगु मौका दुगु खः ।
थ्व स्वया न्ह्यः ला लिगा व कोपा डेल रे त्याकुगु टिमं तपिक हे सुपर कप म्हित वयाच्वंगु खः ।
रियलं भ्यालेन्सियायात टोनी क्रुस, इस्को व लुका मोडरिचपाखे छगु छगु गोल याना त्याकेत तालाःगु खःसा भ्यालेन्सियाया लागि डानी पारेजेें पेनाल्टीपाखे छगु गोल याउगु खः ।
उगु कासाय् १५गु मिनेटय् क्रसुं कर्नर, ३९ गु मिनेटय् इस्को, व ६५गु मिनेटय् मोडरिच रियलया लागि गोल याउगु खः । अथेहे भ्यालेन्सियाया लागि पारेजों इन्जुरी इलय् पेनाल्टीं गोल याउगु खः ।
रियल आः बार्सिलोना व एट्लेटिको मड्रिड दथुइ निगुगु सेमिफाइनल सु त्यात वनाप म्हिति ।
