स्पेनयात बुकाः इटाली युरोकप फुटबलया फाइनलय्
बछलागा त्रयोदशी ११४१,असार २३ बुधवाः
स्पेनयात बुकाः इटाली युरोकप फुटबलया फाइनलय् दुहाँवंगु दु ।
इंग्ल्याण्डया लण्डनस्थित वेम्बले रंगशालाय् थौं सुथय् क्वचाःगु सेमिफाइनलया कासाय् इटाली टाई बे्रेकरय् त्याःगु खः । कासाया ६०गूगु मिनेटय् फेडेरिको किएसां गोल यानाः इटालीयात अग्रता बिइकूगु खः ।
८०गूगु मिनेटय् अल्भारो मोराटां स्पेनया नितिं ज्वलिंज्वः कासा म्हितूगु दु । क्वःछिनातःगु ईलय् १–१गू गोलया ज्वलिंज्वः जुइवं कासाय् ई थप यानाब्यूगु खः ।
थप याःगु ईलय् न गोल यायेमफयेवं कासायात टाइब्रेकरय् यंकूगु खः । टाई ब्रेकरय् इटाली ४–२ गोल अन्तरं त्याःगु दु । स्पेनया मोराटां गोल याये मफयेवं इटालीयापाखें लिपांगु गोल याःगुलिसे जर्जीनों कासायात निर्णायक यानाब्यूगु खः ।
इटालीं आः फाइनलय् इंग्ल्याण्ड व डेनमार्कदथुइ जुइगु निगूगु सेमिफाइनल कासाया त्याकूमिलिसे म्हिती ।
Categorized in कासा
