२०७८ माघ ५, बुधबार

स्पेनिस लिगय् रियाल मड्रिडं भ्यालेन्सिया यात बुकल

थिंलागा सप्तमी ११४२, पुष २५ आईतवाः

स्पेनिस लिग फुटबलय् शिर्ष थाय्या रियाल मड्रिडं भ्यालेन्सीयायात ४गू–१गूया गोल अन्तरं बुकुगु दु ।

थःगु हे मैदानय् जूगु कासाय् रियाल मड्रिडयात त्याका बिइत करिम बेन्जमा व भिनिसियस जुनियरं निगू निगू गोल याःगु खः । बूगु टोली भ्यालेन्सीयाया गोन्कालो गुएडेसं छगू गोल याःगु खः ।

कासा त्यागु लिसें रियाल मड्रिडं धलःया शीर्ष थासय् ८ गू ल्याःया  अग्रता दयेकुगु दु । लिगय् २१गू कासां रियाल मड्रिडया ४९गू ल्याः जूगु दु । निगू कासा म्हो म्हितूगु सेभिया ४१गू ल्याः लिसें निगूगु थासय् दु ।

स्पेनिस लिगया हे मेगु कासाय् बार्सिलोनायात ग्रानाडां १गू–१गू गोलया ज्वलिन्ज्वःलय् दिकुगु दु । ग्रानाडाया  मैदानय् जूगु कासाय् बार्साया लुक डे योङं न्हापांगु गोल याःगु खः ।

तर ग्रानाडाया एन्टोनियो पुएर्तासं ८९गूगु मिनेटय् छगू गोल याना कासा ज्वलिन्ज्वः याःगु खः । वंगु चान्हय्सिया मेगु कासाय् रियाल मयोर्कालं लेभान्तेयात २गू–०या गोल अन्तरं बुकुबलय् रियाल सोसीडाडं सेल्टा भिगोयात १गू–०या गोल अन्तरं बुकुगु दु  ।

Categorized in कासा