स्वंगुया भरय् खःला नेवाः फिल्म
बिजयरत्न असंबरे
“च्वापुफय्”, “जामनगुभाजु” व “लाखेभाजु” थौंकन्हय् तसकं बय्बय् जुयाच्वंगु नेवाः संकिपा खः । थ्व स्वंगुलिं संकिपाया छता ज्वःलाःगु खँधइगु थ्वखः कि थ्व स्वंगुलिं संकिपा नेपाः देय्या इतिहास लिसे स्वापू दु गु संकिपा खः । उलि जक मखसे थ्व स्वंगू संकिपायात नेवाः संकिपाया लँपु क्वः छीगु संकिपा कथं नं कया तःगु दु । थुलि बाहेक स्वंगू संकिपाया बाखं व प्रस्तुति धाःसा बिस्कं बिस्कं जुइ ।
थ्व स्वंगुलिं संकिपाय् ज्वः लाःगु छता मेगु खँ धइगु कलाकार सुरज व्यञ्जनकार नं खः । स्वंगू संकिपा मध्ये “च्वापुफय्” या चर्चा जुया च्वंगुया हुनि धइगु छगू थुकिया ‘बजेट’ खःसा मेगु नेपाः व ल्हासालिसे स्वाःगु व्यापारया बाखं खः ।
राणाकालीन परिबेशया थ्व बाखनय् उगु ईया नेवाः संस्कार व तजिलजिया नाप नापं राणाकाल व बृटिश सरकार दथुया स्वापूया तक याः चित्रण याना तःगु धाःगु थ्व संकिपा छगू ‘बीग बजेट’ अले ‘मल्टि स्टार’ संकिपा जक मखसे नेपालभाषा, खस नेपाली, अंग्रेजी व तिब्बति भाय् छ्यलाः दय्का च्वंगु संकिपा खः ।
थुकी एनिमेशन प्रविधिया माध्यमं उगु ई या लू सिर्जना याइगु खःसा थ्व संकिपाया बजेट स्वंगू करोड तुइगु खँ दु । इतिहासविद ओमचरण अमात्यया निर्माण परिकल्पनाय् थ्व संकिपाया निर्देशक प्रदीप खड्गी खः ।
वय्कलं दय्कादीगु खस नेपालीभाय्या ऐतिहासिक संकिपा “कीर्तिपुर द लिजेण्ड अफ कीर्तिलक्ष्मी” पिदने धुंकूगु दु । थ्व “च्वापुफय्” नेवाः लोककाव्य“ जिया वया ला लच्छि मदुनि” या लिधंसाय् दय्काच्वंगु संकिपा खः ।
चर्चा य्वया च्वंगु मेगु संकिपा “जामन गुभाजु” खः । नेपाः देय्या छम्ह पुलांम्ह जाःम्ह तान्त्रिक गुरुजुया सिद्धिया बाखं दु गु “जामन गुभाजु” संकिपा नेवाःतय् दथुइ लोकं ह्वाःगु बाखं खः। छम्ह तान्त्रिकया बाखं ज्वनाः पिलु वय्त्यंगु थ्व संकिपा नं “मल्टि स्टार संकिपा” खः ।
मू बाखं कथं थुकी मल्ल जुजु प्रताप मल्लया पालय् हिन्दुस्तानं वःम्ह छम्ह जाःम्ह जादुगरं नेपालमण्डल य्चटक क्यनाः जनतायात झंगः ल्हाना च्वंगु खनाः जामन गुभाजुं उम्ह जादुगर चटकेयात पाठ स्यनेत याइगु कुतः धुंकाःजादुगर व जामन गुभाजु दथुइ जुइगु धें धें बल्लायात न्ह्यब्वया तःगु दु ।
जादुगरया चटक व जामन गुभाजुया तान्त्रिक चमत्कारया लू नं “च्वापुफय्”या थेें तुं एनिमेशनया ग्वाहालिं तयार याःगु खःसा थ्व संकिपा नेवाः जनजीवनया बाखं जूगुलिं नं आपासि नं आस्कुतिं मिखां स्वया च्वंगु संकिपा खः ।थ्व संकिपाया निर्देशन रवि साय्मिं यानादीगु खःसा वय्कः भाजु नेपाःया संकिपा ख्यःया नांजाःम्ह क्यामेराम्यान खः ।
“लाखे भाजु” नं आपासि नं आस्कुतिं मिखां स्वयाच्वंगु संकिपा खः । थ्व संकिपाया निर्देशक आर्यम नकःमि खः । आर्यम नकःमि धइम्ह नेवाः संकिपा ख्यःया छम्ह नांजाःम्ह संकिपा निर्देशक खः । “सुभाय्” निसें “भिन्तुना”, “माया”, “लय्”, “तुयुमति” लिसें यादर्ज नं मल्याक्क धिसि लाःगु नेवाः संकिपा दय्के धुंकूम्ह आर्यम नकःमिया थ्व संकिपाया निर्माता आशिष्मा नकःमि खः ।
आशिष्मा धइम्ह नेवाः संकिपाया जक मखसे खस नेपाली संकिपाया नं लोकं ह्वाःम्ह हिरोइन् खः । थुकथं संकिपा ख्यलय् ज्वः मदुगु योगदान दु पिं आर्यम व आशिष्मा जानाः दय्का च्वंगु “लाखेभाजु” नं नेपाः देय्या पुलां बाखनय् आधारित संकिपा खः । नेवाः तय्सं परम्परांनिसें पुज्याना वया च्वंम्ह व राक्षसया रुप जूसां द्यःभाः पियातःम्ह लाखेया किम्बदन्तिया लिधंसाय् दय्काच्वंगु “लाखेभाजु” नं मल्टिस्टार संकिपाखः। नापं “बीग बजेट” संकिपा नं खः ।
विशेष यानाः नेवाः संकिपाया बजेट धइगु थौं कन्हय् निगू लख तका निसें झिगू लख तका तक जुया वयाच्वंगुली “लाखेभाजु”या बजेट ख्वीगू लख तका तक थ्यंगु न्यनेदु । थ्व संकिपाया बाखं पक्षला सशक्त जु हे जुल उलि जक मखसे थ्व संकिपा दय्केगु नितिं नेपाः या संकिपा ख्यःया नांजाःपिं बञ्जाःत प्रदीप उदय, गोपालकाजी कायस्थ व नरेन्द्र महर्जनपिनिगु नं लाय्दुगुलिं यानाः थ्व संकिपा नेपाःया संकिपा बजारया स्वकुमि तक नं थ्य निगु आशायाय् थाय् दु । उलि जक मखसे थ्व संकिपाय् नेपालं पिने च्वना च्वंपिं नेवा तय्गु नं लाय् दुगुलिं यानाः थ्वसं किपा नेपालं पिने नं थ्य निगु सम्भावना ब्वलना वःगु दु ।
थुकथं थौंया इलय् थ्व स्वंगू संकिपाया चर्चा तसकं जुया च्वंगु दु सा थ्व स्वंगू संकिपां नेवाः संकिपाया लँपु हे हिलीधइगु आशा यानातःगु दु । तर अथे धाय्वं मेमेगु नेवाः संकिपा जक म्हो महत्वया जुइ धइगु पक्कां हे मखु । थौंकन्हय् नेवाःसंकिपा स्वकुमिया ल्याः अप्वः या वया च्वंगु दु धइगुया दसूकथं निर्देशक पवन जोशीया “बसन्तऋतु”, अमृतमान महर्जनया “स्वय्नगु” व बाशु शाहीया “वाः या दुने जाकि दु” थें जाःगु स्वंगू संकिपाया च्यारिटी शो जूगु इलय् स्वकुमितआपालं वयाच्वंगुलिं नं क्यं ।
अथे हे तुं आः याकनं हे पिदने त्यंगु स्वंगू संकिपा पूर्णकाजी ज्यापु व अनुज महर्जनं निर्देशन याःगु “हिसिमति”, राजेन्द्रमान शाक्यया “रश्मी” व राजेशमान सिंंहया “लिबाय् धुंका” नं स्वय्बहःगु संकिपा जुयाः पिद निगु संकिपा कथं कया तःगु दुसा निर्माणया झ्वलय् लाना च्वंगु स्वंगू संकिपा निर्देशक सुरेश शाहीया “मां”, सुरेन्द्र तुलाधरया “जेण्टलमेन” व “तिन तिकः महा बिकः” दय्कूगु दीपक कपालीया पुचलं दय्का च्वंगु “जातः” नं लाना च्वंगु दुसा निर्माणया थी थी चरणय् थ्यना च्वंगु “लमि”,
“आ...छु याय्” व “लाखे द लिजेण्ड” नां यागु एनिमेट संकिपा नां यागु स्वंगू संकिपा छगू बिस्कं सवाः ज्वना वइगु नेवाः जुइगु खँय् आशा याय्थाय् दु । थुकथं थौंकन्हय् थी थी हुनिं स्वंगू नेवाः संकिपाया चर्चा जुया च्वंगु दु ।
