स्वक्वःगु ताम्रकार फुटसलया उपाधि करुणामय मेटलयात
लहनान्युज | ञलागा पंचमी ११३८ ( सेप्तेम्वर २०१८ )
तसकं थाकूगु कासाम्हिता समूह चरण पार यानाः सेमीफाइनल दुहां वंगु करुणामय मेटल क्राफ्टं स्वक्वःगु ताम्रकार फुटसल कासा २०७५या उपाधि त्याकूगु दु । ताम्रकार समाजया युवा तथा खेलकूद उपसमितिया ग्वसालय् जूगु उगु कासाया फाइनलय् करुणामयं फोरेगो ट्रेडिङ्गयात टाइब्रेकरय् ३–२या गोलं बुकूगु खः ।
क्वःछिनातःगु इलय् निखेरं छगू हे गोलजुइमफूगु खः ।थ्व स्वयां न्ह्यःजूगु सेमीफाइनल कासाय् करुणामयं वंगलामुखी फर्निचरयात १ गू गोलं व फोरेगों साहिल मेटल क्राफ्टयात टाइब्रेकरय् ३–१ गोलं बुकाःफाइनलय् दुहांवंगु खः ।
विजेता व उपविजेता टिमयात नेपाल प्रहरीयाअतिरिक्त प्रहरी महानिरीक्षक ठूले राई, समाजया नायः रविन्द्रराज ताम्रकार, उपसमितिया संयोजक सजेश ताम्रकार, प्रतियोगताया संयोजक अभिन ताम्रकारपिन्सं ट्रफि, मेडल, दसिपौ व दां सिरपाः कथं लःल्हाःगु खः । विजेता व उपविजेता टिमयात छसि कथं झिद्वः तका व न्याद्वः तकाः लःल्हाःगु खः ।
कासाय् साहिल मेटलया लिउसन राजकर्णिकार उच्च गोलकर्ता, फोरेगोया सानिध्य चित्रकार उत्कृष्ट गोलकिपर, फोरेगोया सुभाषित ताम्रकार प्रेसिडेन्सियल च्वाइस नापं करुणामयया दिनेश ताम्रकार उत्कृष्ट कासामि घोषित जूगु खः । उत्कृष्ट कासामिपिन्त दां व ट्रफिपाखें सम्मानित याःगु खः । उगु हे दिनस मिसापिनिगु मैत्रीपूर्ण कासा व अण्डर १४, अण्डर १०या प्रदर्शन कासा नं जूगु खः ।
