स्वक्वःगु पेजथ्री अवार्ड जुइगु जुल
लहनान्यूज | तछलाथ्व पुन्हि ११३७ (जुन ९ २०१७)
स्वक्वःगु पेज थ्री पिपल्स च्वाइस अवार्ड वइगु ऋषिपंचमिया दिनस जुइगु जूगु दु ।
थौं ई ल्वहं प्रकाशनपाखें येँय् जूगु नःलि लयपौया १०० ल्याः व पेजथ्री पिपल्स च्वाइस अवार्डया घोषणा ज्याझ्वलय् पेजथ्री बाःछिपौया सम्पादक व मू व्यवस्थापक दर्शनवीर शाक्यं ने.सं. ११३३ किजा पुजाया दिंनिसें ने.सं. ११३७ तछलागा आमै तक्क पिदंगु संकिपा, म्युजिक भिडियो व म्ये अवार्डया नितिं दुथ्याइगु धयादिल
निश्चित दुतिना ल्हापं पुलाः फारम जायेकाः अवार्डया नितिं प्याखं, एल्बमलिसें छपु म्ये वा छपु म्युजिक भिडियो तकं अवार्डया नितिं दुथ्याके फइगु मू व्यवस्थापक शाक्यं धयादिल ।
अवार्ड ज्याझ्वलय् पेजथ्री पिपल्स च्वइस संकिपा अवार्ड दुने उत्कृष्ट संकिपा, उत्कृष्ट निर्देशक, उत्कृष्ट मिसा कलाकार, मिजं कलाकारलिसें मुक्कं १८ विधाय् अवार्ड बीगु जूगु दु ।
पेजथ्री पिपल्स च्वइस म्यु्जिक भिडियो अवार्डय् उत्कृष्ट म्यूजिक भिडियो, निर्देशक, क्यामेरा पर्सन, भिज्युअल एडिटर, मिसा मोडल, मिजं मोडल लिसें न्हयगू विधाय् अवार्ड बीत्यंगु दु ।
पेजथ्री पिपल्स च्वइस संगीत अवार्डय् धाःसा उत्कृष्ट मिसा सः, मिजं सः, संगीतकार, उत्कृष्ट म्येचाःलिसें मुक्कं च्यागू विधाय् अवार्ड लःल्हायेत्यंगु दु ।
अवार्ड ज्याझ्वलय् नेवाः कला ख्यलय् निरन्तर योगदान बिया वयाच्वंम्ह छम्ह कलाकारयात पेजथ्री लाइफटाइम एचिभमेन्ट अवार्ड नं बीगु जूगु दु । लाइफटाइम एचिभमेन्ट अवार्डया घोषणा धाःसा अवार्ड ज्याझ्वलय् जक याइगु जूगु दु ।
ई ल्वहंपाखें छात्रवृत्ति नं लःल्हात
अवार्ड घोषणा स्वयां न्ह्यः उगु हे ज्याझ्वलय् नःलि साहित्य लयपौया १०० ल्याःया ज्याझ्वः नं जूगु खः ।
ज्याझ्वलय् ईल्वहं प्रकाशनया प्रवन्ध निर्देशक नरेशवीर शाक्यं नःलिया १०० ल्याःतक्कया विस्तृत जानकारी बियादिल ।
लिसें ज्याझ्वलय् नेपालभाषा कयाः उत्कृष्ट जूपिं विद्यार्थीपिनिगु नितिं निगू ब्वनेकुथियात ईल्वहंपाखें छात्रवृत्ति नं लःल्हाःगु खः ।
ईल्वहंपाखें मातृभाषा व शिक्षा अभियानकथं नेवाः ईंग्लिस स्कुल थेच्वया ४ व ५ तगिमय् नेपालभासा बिषयलय् उत्कृष्ट जूपिं निम्हेसित ६द्वः, ६द्वः तका लःल्हाःगु खः ।
दाता दानशोभा तुलाधरं थः अबु करुणारत्न तुलाधरया नामं स्वनातःगु १०द्वः तकाया करुणा सिरपाः ईल्वहंपाखें ५द्वः तका यानाः १५द्वः तका हलिं नेवाः स्कुलया आर्थिक स्थिति कमजोर विद्यार्थीपिनिगु नितिं लःल्हाःगु खः ।
उगु हे ज्याझ्वलय् ई ल्वहं प्रकाशनय् १०दँ न्ह्यःनिसें आवद्ध जुयाः ग्वाहालि याना वयाच्वंगु धकाः पेजथ्री पत्रिकाया रविन्द्र शाक्ययात हंगु नं खः । पेजथ्रीया संस्थापक रोजन शाक्य, अर्विन्द्र मान सिंह व दर्शनवीर शाक्यं सम्मानित शाक्ययात खादां न्ययेकाः हनापौ लःल्हानादिल ।
Categorized in मनोरन्जन
