'स्वनिगःयात संक्रमणं बचे यायेत स्वनिगःया नाका कडाइ यायेमाल'
बिराजकाजी राजोपाध्याय | बछलाथ्व त्रयोदशी ११४०
नेपालय् तराईपाखे कोरोना संक्रमितया ल्याः अप्वया वनेवं उखें नं धमाधम येँय् दुहांवयेगु अप्वःगु खः । छुं दिं न्ह्यः येँय् संक्रमित खनेदयेवं येँ त्वःतावंपिं हाकनं उखें नं येँय् वयेगु न्हिथं अप्वयावःगु दु । थज्याःगु परिस्थितीं देशय् संक्रमण न्यनीगु अवस्था वयेफुगु धासें थनया स्थानीय निकायया प्रमुखतयसं स्वनिगलय दुहां वइपिन्त कडाइ यायेत माग याःगु दु ।
मंगलवाः उपत्यका नगरपालिका फोरमं उपप्रधानमन्त्री लिसें कोभिड–१९ उच्चस्तरीय समन्वय समितिया संयोजक ईश्वर पोखरेलयात नापलाना थथे इनाप याःगु खः ।
स्वनिगलं विद्यार्थी व मजदुरतय्त पिने छ्वयेगु व पिनेया जिल्लां थुखे मनूत छ्वयाहयेगु होडबाजीं कोरोनाया संक्रमण झन् तच्वइगु खँ न्ह्यथंसें फोरमं तत्काल स्वनिगः दुहांवइपिंत कडाई यायेत इनाप यानादीगु खः । नापं स्वनिगः दुने अत्यावश्यक गाडीत बाहेक मेगू सवारी साधन दुकायेगुलिइ कडाई यायेत नं सुझाव बिउगु खः ।
व हे झ्वलय् येँ महानगरपालिकाया मेयर नापं फोरमया अध्यक्ष विद्यासुन्दर शाक्यं स्वनिगः दुहांवइपिंत कडाई मयायेगु खःसा थन थप समस्या वयेफुगु धासें चिन्ता प्वंकादीगु खः ।
संघीय राजधानी समेत जुयाः ७७गुलिं जिल्लाया मनूत मुनाच्वंगु थाय् जूगुलिं स्वनिगःया खँय् संघीय सरकारं हे ध्यान तयेमाःगु खँ न्ह्यथँसें कामपा प्रमुख शाक्यं थुकी सकलसिनं दलीय भावनां थहांवनाः मंकाः कुतः न्ह्याकेमाःगु नं धयादिल । ।
‘थन संक्रमण अप्वयावन धाःसा नियन्त्रण यायेत हे थाकुइफु । अथेजुयाः थन नाकाय् कडाई यायेगु, स्वनिगःबासीया जीविकायात सहज दयेकेगु लिसेंया खँय् दक्वं राजनीतिक दल व जनप्रतिनिधिया सामूहिक प्रतिवद्धता आवश्यक दु’ कामपा प्रमुख शाक्यं धयादिल ।
वय्कलं स्वनिगः वयेगु नाकाया सुरक्षा व्यवस्था कडा यानाः स्वनिगः दुने लकडाउन छ्वासुकेमाःगु सुझाव नं बियादीगु खः ।
उगु इलय् समन्वय समितिया कजि पोखरेलं नगरपालिका फोरमं बिउगु सुझावयात मन्त्रीपरिषद मुँज्याय् यंकेगु व अन सहलह यानाः आवश्यक निर्णय यायेगु धयादिल ।
खँल्हाबल्हाया इलय् कामपया मेयर शाक्य नापं यल महानगरपालिकाया मेयर चिरिबाबु महर्जन, थिमि नगरपालिकाया मेयर मदनसुन्दर श्रेष्ठ नापं येँया सांसदत कृष्णगोपाल श्रेष्ठ व जीवनराम श्रेष्ठया तकं उपस्थिती दुगु खः ।
Categorized in राष्ट्रिय
