स्वनिगःया नाका सील यायेत इनाप यासें कामपां गृहयात पौ छ्वइगु
बिराजकाजी राजोपाध्याय | २०७७ जेठ ६, बछलागा एकादशी ११४०
येँ महानगरपालिकां लकडाउन ज्वःछि स्वनिगः दुहांवयेगु दक्वं नाकात सिल यायेत सरोकारवाला दक्वसित पौ च्वयेगु निर्णय याःगु दु।
कामपाया ४६गूगु विशेष नगर कार्यपालिका बैठकं लकडाउन उल्लंघन यानाः मनूत स्वनिगलय् दुहां वयाच्वंबलय् थन कोरोनाभाइरस संक्रमणया खतरा अप्वयावंगुलिं नाकात सिल यायेत गृह मन्त्रालय व जिल्ला प्रशासन ज्याकू येँयात इनाप यायेगु निर्णय याःगु खः ।
लिपांगु इलय् थीथी त्वहलय्, सुलाः सुलाः वा शक्तिया बलय् स्वनिगलय् दुहांवयेगु अप्वःगु व उकथं पिने जिल्लां वःपिंके हे संक्रमण पुष्टि जुयावःबलय् स्वनिगलय् दुहांवयेगु नाकाय् कडाई यायेत कामपा लिसें उपत्यका नगरपालिका फोरमं तकं संघीय सरकारयात निरन्तर माग यानावःगु दु ।
थ्वयां न्ह्यः नं उपत्यका नगरपालिका फोरमं कोभिड १९ सम्वन्धी उच्चस्तरीय समन्वय समितिया कजि तकं खःम्ह उपप्रधान अले रक्षामन्त्री ईश्वर पोखरेल व गृहमन्त्री रामबहादुर थापायात नापलानाः स्वनिगः दुहांवयेगु सीमा नाकाय् कडाई यायेत माग यायेधुंकूगु दु ।
व धुंकाः नं सुविधा वा पासया दुरुपयोग यासें अथवा सुलाः सुलाः स्वनिगः दुहांवयेगु ज्या द्यूगु मदुनि ।
थज्याःगु अवस्थाय् अनुमति मदयकं सुलाः सुलाः स्वनिगः दुहांवइपिं मनूया लिसें उमित थन दुत हयेत ग्वाहालि याइपिन्त तकं कानुन कथं कार्वाही यायेत कामपां गृह मन्त्रालययात इनाप याइगु जूगु दु ।
‘स्वनिगः छगू शान्त पुखूचा थें जुयाच्वंगु खः, तर आः शान्त पुखुलिइ चागःचा कयेकूगु थें जूगु दु’, येँ महानगरपालिकाया मेयर विद्यासुन्दर शाक्यं धयादिल । ‘जिम्मेवार मनूतयसं तकं सुविधाया, पासया दुरुपयोग यासें, शक्तिया बलय् लकडाउन उल्लंघन यानाब्यूबलय् म्हिगःतक्क येँ सुरक्षित दु धायेफइगु अवस्था थौं मन्त ।’
येँ महानगरपालिकाया कार्यपालिका वैठकं येँय् कोरोनाभाइरस कोभिड १९ या रोकथाम व नियन्त्रणय् बः ब्युसें थीथी निर्णयत याःगु दु ।
कार्यपालिका वैठकं अत्यावश्यक ज्याय् स्वनिगः वइपिन्सं प्रस्थान विन्दुइ हे कोरोना भाइरस सम्बन्धी स्वास्थ्य परीक्षण याकाः संक्रमण मदुसा जक हे स्वनिगलय् दुहांवयेगु अनुमति बीगु व्यवस्था यायेत नं गृह मन्त्रालययात इनाप यायेगु निर्णय याःगु दु ।
‘लकडाउन इलय् स्वनिगः दुहां वइपिन्त पास जारी यायेबलय् थन वयाः च्वनीगु थायया पूवंगु विवरण, सम्पर्क फोन नं. व छेँ थुवाःया नां लिसेंया विवरण कयाः येँ महानगरपालिकायात उपलब्ध याकेत माःगु व्यवस्था यायेत इनाप यायेगु निर्णय वैठकय् जूगु दु’ कामपा प्रवक्ता लिसें कामपा १५ वडाध्यक्ष ईश्वरमान डंगोलं जानकारी बियादिल ।
कामपा क्षेत्रय् माःगु संख्याय् क्वारेन्टाइन सञ्चालन व व्यवस्थापन यायेत सःशुल्क क्वारेन्टाइन तकं न्ह्याकेगु व्यवस्था यायेत जिल्ला प्रशासन ज्याकूयात पौ छ्वइगु जूगु दु ।
अत्यावश्यक सेवाय् दुपिं जनप्रनिधि, कर्मचारी, स्वास्थ्यकःमित, सञ्चारकःमि, सुरक्षाकःमि व स्वयमसेवकतयत सितिकं परिक्षणया व्यवस्था यायेत नं कामपां संघीय सरकारयात इनाप याःगु दु ।
लकडाउन ताःहाकयावंबलय् खुइगु, घरेलु हिंसा, मानसिक ल्वय् थुज्वःगुस समस्या अप्वइगु सम्भावना खनेदुगुलिं सुरक्षा निकायया भूमिका व सक्रियता थप प्रभावकारी दयेकेत नं गृह मन्त्रलाययात इनाप याइगु जूगु दु ।
कामपाया दक्वं वडा समितितयसं लकडाउन ज्वःछि विदेश वा स्वनिगः पिनं वयाः च्वनाच्वंपिनिगु पूवंगु विवरण तयेगु लिसें निगरानी यायेगु व उसाँय् परीक्षण याः मयाःगु विवरण अद्यावधिक यायेगु व्यवस्था ताःलाकेगु व लकडाउनया इलय् जुयाच्वंगु राहत इनेज्यायात आः श्रमय् आधारित राहत ग्वाहालि जक बीगु ब्यवस्था यायेत कार्यविधि तयार यानाः कार्यान्वयन याइगु जूगु दु ।
Categorized in राष्ट्रिय
