स्वनिगः दुने भेला, प्रदर्शन व जात्रा सञ्चालनय् रोक
लहनान्युज | गुंलागा १० ११४०,साउन ३० शुक्रवाः
स्वनिगः दुने येँ, यल व ख्वप स्वगू जिल्लाय् सार्वजनिक थासय् भेला यायेगु, प्रदर्शन यायेगु व पारिवारिक जमघट यायेगुलि रोक लगे याःगु दु ।
थौं शुक्रवाः येँ, यल व ख्वप जिल्लाया प्रमुख जिल्ला अधिकारीपिनिगु मंकाः बैठकं खुला थासय् भेला जुइगु, हुलमुल यायेगु व सभा जुलुस यायेगु निषेध याःगु दु ।
साउन ३० गते चान्ह्यः १२ बजे निसे भदौ १५ गते चान्ह्यः १२ बजे तक या लागि प्रतिबन्ध तयाःगु धका स्वगू जिल्लाया प्रमुख जिल्ला अधिकारीपिन्स थौं शुक्रवाः बहनि जारी याःगु छुट्टाछुट्टै आदेशय् उल्लेख याःगु दु ।
अथेहे हुलमुल जुइगु गतिविधि जात्रा, महोत्सव सञ्चालन यायेगुलि रोक लगे याःगु दु ।
न्हिया न्हिथं जुइगु नित्यपूजा बाहेक दक्को धार्मिक गतिविधिइ न रोक लगे याःगु दु । आः पुजारीं नित्य पूजा बाहेक मेपिन्त द्यःया थाय् वनेगुलि न प्रतिबन्ध तयागु दु धका प्रमुख जिल्ला अधिकारीपिन्स जारी याःगु आदेशय् उल्लेख दु ।
अथेहे नखः चखः, धार्मिक– साँस्कृतिक ज्या यायेत थःथितीपि नाप जमघटय् न प्रतिबन्ध तःगु दु । आः परिवारया सदस्य बाहेक थःथितीपिन्स सःतूगु धार्मिक साँस्कृतिक गतिविधि न याये दइ मखू धका प्रशासनं धाःगु दु ।
शैक्षिक संस्था सञ्चालनय् पूर्ण रोक लगे याःगु दु । दक्को प्रकारया सभा, गोष्ठी, तालिम, सेमिनार, सिनेमाहल, पार्टी प्यालेस, मनोरञ्जन स्थल, सैलुन, ब्युटी पार्लर, स्पा, स्विमिङ पुल, जिमखाना, खेलकुद व खेल प्रस्तुति तथा पुस्तकालय सञ्चालनय् न रोके याःगु दु ।
अथेहे कवाडी संकलन यायेगु, फुटपाथ, खुल्ला थाय् व ठेला गाडा व साइकल सञ्चालन जुइगु व्यवसायय् न रोके याःगु दु ।
उद्योग व्यवसाय सञ्चालनया लागि स्वास्थ्य मापदण्ड विपरीत श्रमिकपिन्त ल्ह्ययेगु व टेक अवे बाहेक रेस्टुरेन्ट सञ्चालनय् न कडाइनक्सा प्रतिबन्ध तःगु दु ।
आदेशय् निषेध याःगु ज्या यातकि स्थानीय प्रशासन ऐन २०२८ कथं कारबाही यायेगु धका प्रमुख जिल्ला अधिकारीपिन्स उल्लेख याःगु दु ।
